Verslunarmannahelgin verður miklum mun viðburðasnauðari en vonir stóðu til og áætlanir gerðu ráð fyrir. Hertar samkomutakmarkanir hafa gert út af við allar fyrirhugaðar fjöldasamkomur og útihátíðir þar sem Þjóðhátíð í Eyjum skilur vitaskuld eftir sig stærsta skarðið annað árið í röð.

Í fyrra var með öllu óhjákvæmilegt að slá hátíðina af en í ár var útlitið miklu bjartara og allt var tilbúið fyrir fyrirhugaða og mögulega stærstu Þjóðhátíð sögunnar 2021 þegar Delta-afbrigðið laumaði sér inn í landið og gerði út um allar vonir og fögur fyrirheit.

Svava Kristín Grétarsdóttir, íþróttafréttakona á Sýn, hefur ekki farið leynt með vonbrigði sín á samfélagsmiðlum en var þó að komast í vægt þjóðhátíðarskap þegar Fréttablaðið heyrði í henni hljóðið í gær.

„Þetta er alveg öðruvísi núna,“ segir hún þegar hún er spurð hvort vonbrigðin í ár séu ekki enn meiri en í fyrra. „Þegar við byrjuðum í fyrra að ferðast innandyra, í mars-apríl, þá bjóst maður samt ekki við því að það yrði ekki Þjóðhátíð. Maður var bara þvílíkt bjartsýnn.“

Pirringur víkur fyrir sorg

Raunin hafi þó orðið önnur og ósköp lítið við því að segja. „En ég hefði getað sett milljón á að það yrði Þjóðhátíð í ár. Að þetta yrði ekki ennþá í gangi ári seinna. Það var alveg hræðilegt í fyrra að hugsa: Guð minn góður! Það er bara ár í að við fáum Þjóðhátíð.“

Nú stendur Eyjafólk hins vegar frammi fyrir því að það verður engin Þjóðhátíð tvö ár í röð og tilfinningarnar eru blendnar. „Í fyrra var svona pirringur en núna er bara rosalega mikill leiði einhvern veginn á eyjunni. Það er rosa sorg bara,“ segir Svava Kristín og hlær nú samt.

„Það er eiginlega bara þannig. En það er samt bara eins og í fyrra að allir eru að reyna að gera sitt besta. Við tæklum þetta bara eins og Þjóðhátíð. Við tölum eins og það sé Þjóðhátíð. Eini munurinn er sá að við förum ekki inn í Dal.“

Sara Sjöfn segir fjölskyldurnar halda í hefðirnar óháð öllu öðru.
Fréttablaðið/Aðsend

Hvítum tjöldum slegið upp

Sara Sjöfn Grettisdóttir, ritstjóri Þjóðhátíðarblaðs Vestmannaeyja í ár, tekur í sama kassagítarstreng. „Svona er þetta bara og þessu verður ekki breytt. Auðvitað er þetta grautfúlt en maður skilur þetta alveg. Vonbrigðin eru mikil hjá flestum en fólk er að reyna að gíra sig upp og reyna að gera gott úr þessu,“ segir Sara Sjöfn sem fær ekki betur séð en að fólk reyni almennt að hafa gaman með vinum og fjölskyldu.

„Já, já. Ég er búin að skreyta allan garðinn hérna heima hjá mömmu og pabba og það eru hvít tjöld í mörgum görðum hérna. Hér og þar er verið að plana alls konar garð- og tjaldpartí alla helgina,“ segir Svava Kristín og tekur undir að í raun megi tala um lítil Þjóðhátíðarútibú víða um bæinn.

„Það er fullt af hvítum tjöldum í görðunum úti um allan bæ og fólk er að halda í fjölskylduhefðirnar með sínu fólki,“ heldur Sara Sjöfn áfram. „Fjölskyldur halda í sínar hefðir og eru þær margar eins og fólkið er margt,“ segir Sara Sjöfn sem veit ekki betur en að Dalnum verði lokað frá og með deginum í dag.

„Mér heyrist á öllum að þeir ætli að gera eitthvað en þetta verður ekki svona þriggja daga dæmi eins og ef þetta væri inni í Dal.“

Sara Sjöfn segir ekkert jafnast á við stuðið inni í Dal.
Mynd/Aðsend

Grátt ofan á svart

Svava Kristín segir að ekki hafi heldur bætt úr skák að ofan í 200 manna samkomutakmörkunina, sem gerði út af við Þjóðhátíðina, hafi börum og skemmtistöðum verið gert að loka klukkan 23.

„Það er búið að stoppa allt. Bærinn var bara kjaftfullur á fimmtudagskvöld og verið að henda öllum út klukkan ellefu. En það er bara eins og það er og þá bara strunsa allir í halarófu í næstu garða.“

Þjóðhátíð eins og fólk þekkir hana best en Dalurinn verður heldur tómlegur annað árið í röð.
Fréttablaðið/Vilhelm

Engin sófabrekka

Og þar eru kassagítararnir oftar en ekki með í för og víða á lofti. „Já, já. Nóg af kassagítörum. Það er bara þannig og allir bara með drykki í bakpoka. Það er bara eins og það er og við reynum bara að gera sem best út úr þessu,“ segir Svava Kristín en heldur því vandlega til haga að tilhugsunin um tveggja ára Þjóðhátíðarhlé sé erfið og ágeng.

Þrátt fyrir messufallið í Dalnum verður Brekkusöngurinn sendur út í beinu vefstreymi en Svava Kristín segist aðspurð ekki sjá fyrir sér að eyjarskeggjar muni ryðjast upp í sófa til þess að syngja með.

„Nei, ég held það verði mjög lítið um það í Eyjum. Það munu eflaust margir horfa eftir á. Á mánudeginum, en á sunnudeginum reynum við að gera eitthvað gott saman. Eitthvað sem kæmi í staðinn fyrir Þjóðhátíð. Ég veit það eru margir sem eiga rauð blys og það verður eitthvað gert.“

Bætt upp fyrir geðveikina

Svava Kristín segir blóðið einnig renna mannskapnum til skyldunnar og að fólk megi ekki gleyma þeim sem taka á sig þung efnahagslegt högg annað árið í röð.

„Við verðum bara að vera dugleg að ganga á milli og styðja við fyrirtækin sem voru búin að undirbúa sig fyrir Þjóðhátíð og eru náttúrlega að tapa gríðarlegum fjárhæðum.

Þetta er náttúrlega til dæmis rosalegt fyrir veitingastaðina sem voru búnir að kaupa rosalega mikið inn fyrir geðveikina sem Þjóðhátíð er. Og þetta er sko bara hráefni sem verið er að kasta. Þannig að mér heyrist svona á flestum að þeir ætli allir að vera duglegir að sækja staðina og reyna að styðja þá eins og hægt er.“

Þegar Fréttablaðið ræddi við Svövu Kristínu var hún enn að reyna að átta sig á hversu þungur straumur fólks lægi í Eyjar um helgina. „Ég tók rosa mikið eftir því í fyrradag að þetta væri fólk sem hefur tengingu í Eyjar. Ég sá ekki andlit sem ég hef ekki séð áður. Það var náttúrlega bara fimmtudagskvöld þannig að það verður fróðlegt að sjá hvernig þetta verður og ég vona innilega að aðkomufólk hafi ákveðið að taka bara helgi í Eyjum þrátt fyrir að það verði ekki Þjóðhátíð.“