Veður fer versnandi þegar líða tekur á kvöldið og gætu aksturs­skil­yrði versnað tölu­vert í kvöld og á morgun. Einar Svein­björns­son, veður­fræðingur sem heldur úti vefnum Blika.is, segir í sam­tali við Frétta­blaðið að lík­lega verði slæm aksturs­skil­yrði á Hellis­heiði og í Þrengslum í kvöld.

„Það er lægð á leiðinni sem fer vestur fyrir landið og hún ber með sér mildara loft. Það hlýnar ræki­lega á landinu seinna í kvöld og í nótt. Það er nú þegar farið að hlýna hérna suð­vestan­lands en það er gert ráð fyrir því að það geti snjóað á Hellis­heiði og Þrengslum eftir klukkan 20 í kvöld og fram að mið­nætti. Það geta orðið erfið skil­yrði út af blindu,“ segir Einar sem á ekki von á því að færð spillist þar sem lítill sem enginn snjór er fyrir á svæðinu.

„En það getur orðið blint því þessu fylgir allt að því stormur,“ segir hann.

Skammt stórra högga á milli

Appel­sínu­gular veður­við­varanir eru í gildi fyrir Faxa­flóa, Breiða­fjörð, Strandir og Norður­land vestra og Mið­há­lendið í kvöld og fram á morgun. Á þessum slóðum má gera ráð fyrir 18 til 28 metrum á sekúndu með élja­gangi en meiri vindi í hviðum, einkum á Breiða­firði þar sem þær geta farið í 45 metra á sekúndu, að því er fram kemur á vef Veður­stofu Ís­lands.

„Þetta hlýja loft gengur hratt yfir landið og í fyrra­málið verður 5-7 stiga hiti fyrir norðan,“ segir Einar og bætir við að dá­lítil rigning fylgi. Versta veðrið ætti að ganga niður snemma í fyrra­málið en það verður þó skammt stórra högga því fleiri við­varanir eru í gildi frá há­degi á morgun.

Hvasst og blint í éljunum

„Síðan á morgun þá fáum við út­synnings­loftið sem kemur á eftir kulda­skilunum, þá fáum við dá­lítinn élja­gang,“ segir Einar og bætir við að þá muni snjóa á lág­lendi víða um land, einnig á höfuð­borgar­svæðinu. „Það eru helst Norð­austur- og Austur­land sem sleppa. Það er þannig með þessa suð­vestan­átt að hún verður dá­lítið hvöss seinni partinn á morgun og annað kvöld, sér­stak­lega verður hvasst og blint í éljunum og það á við um höfuð­borgar­svæðið líka.“

Gular við­varanir eru í gildi á höfuð­borgar­svæðinu, Suður­landi, Vest­fjörðum og Ströndum og Norður­landi vestra frá há­degi á morgun. Appel­sínu­gular við­varanir verða hins vegar á­fram í gildi á Breiða­firði og Faxa­flóa. Á höfuð­borgar­svæðinu er til að mynda varað við dimmum éljum, hálku á götum og gang­stéttum og mjög tak­mörkuðu skyggni á köflum.

Fyrsti hvellurinn

Einar á ekki von á því að mikil snjó­koma fylgi heldur verði þetta snjófjúk að mestu og dimm él. „Þau ganga yfir á 10-15 mínútum en þetta verður dá­lítið leiðin­legt,“ segir hann. Hann bætir við að þetta sé í raun fyrsti hvellur vetrarins, ef svo má segja.

„Jú, það hafa gengið yfir okkur nokkrar haust­lægðir en tíðin hefur verið til­tölu­lega blíð í haust. Það hefur verið lítið um ill­viðri og oft hæg­látt veður. Það má alveg segja að þessi lægð núna markar á­kveðin kafla­skil, það eru fleiri lægðir á leiðinni í næstu viku, reyndar ekki eins og þessi, en hver veit hvað gerist svo á að­ventunni.“