„Þetta verður allt í lagi, mamma. Vertu bara ró­leg“

Leit að fimm ára dreng sem varð við­skila við móður sína þegar flóð hreif með sér bif­reið þeirra síðast­liðinn mánu­dag hefur enn engan árangur borið.

Af­taka­veður hefur verið í Kali­forníu og var neyðar­á­standi lýst yfir víða vegna vatns­veðurs og flóða­hættu.

Móðir drengsins, Lyndsay Doan, var að skutla piltinum, Kyle Doan, í skólann síðast­liðinn mánu­dag þegar hún ók yfir straum­harða á sem hafði myndast og lá þvert yfir veginn. Hún missti stjórn á Chevro­let Tra­ver­se-jeppa­bif­reið sinni og skorðaðist hún upp við tré fyrir neðan veg.

Lyndsay segir við banda­ríska fjöl­miðla að hún hafi ekið þessa leið daginn áður og þá hafi lítið vatn flætt yfir veginn.

Í frétt AP kemur fram að vatn hafi tekið að flæða inn í bílinn og Lyndsay séð þann kost vænstan að fara út úr bílnum. Náði hún taki á tré og hélt hún í son sinn með hinni höndinni sem hafði klifrað yfir í fram­sætið til að vera hjá móður sinni.

„Þetta verður allt í lagi, mamma. Vertu bara ró­leg,“ segir Lyndsay að Kyle hafi sagt við hana áður en hún missti takið á honum og straumurinn hreif hann með sér. Lyndsay segist hafa sleppt takinu á trénu en straumurinn gert henni ó­mögu­legt að ná til sonar síns sem hvarf henni sjónum.

Um­fangs­mikil leit hefur verið gerð að Kyle en enn sem komið er hefur að­eins annar skórinn sem hann klæddist um­ræddan morgun fundist.