Tólf einstaklingar hafa gefið kost á sér í embætti ríkisendurskoðanda sem stendur til að kjósa um miðjan maí. Nöfn þeirra sem gefa kost á sér hafa verið birt á vef Alþingis.
Ásgeir Brynjar Torfason, PhD í reikningsskilum,
Birgir Finnbogason, löggiltur endurskoðandi,
Davíð Ólafur Ingimarsson, stjórnsýslufræðingur,
Eiríkur Einarsson, viðskiptafræðingur,
Guðmundur Björgvin Helgason, stjórnmálafræðingur,
Guðrún Torfhildur Gísladóttir, löggiltur endurskoðandi,
Jón Arnar Baldurs, löggiltur endurskoðandi,
Jón H. Sigurðsson, löggiltur endurskoðandi,
Jón Magnússon, viðskiptafræðingur,
Kristrún Helga Ingólfsdóttir, löggiltur endurskoðandi,
Páll Grétar Steingrímsson, löggiltur endurskoðandi og
Sigurður H. Helgason, stjórnsýslufræðingur.
Óheppilegur tími kjörsins
Það hefur sætt töluverðri gagnrýni að Ríkisendurskoðun hafi verið falið að rannsaka sölu á hlut ríkisins í Íslandsbanka, ekki síst í ljósi þess að Alþingi mun kjósa nýjan ríkisendurskoðanda meðan á þeirri rannsókn stendur.
Í tilkynningu um ferlið á vef þingsins kemur fram að forsætisnefnd undirbúi kjör ríkisendurskoðanda og að hún hafi valið undirnefnd til þess verkefnis. Í henni sitja Birgir Ármannsson, forseti Alþingis, Oddný G. Harðardóttir, 1. varaforseti, og Líneik Anna Sævarsdóttir, 2. varaforseti.
Undirnefndin hefur gengið frá skipan ráðgjafarnefndar sem á að vera undirnefndinni til aðstoðar við að gera tillögu til forsætisnefndar um einstakling sem forsætisnefnd tilnefnir við kosningu í embættið, en ríkisendurskoðandi er kjörinn á þingfundi.
Eftirtaldir sérfræðingar skipa ráðgjafarnefndina: Þorgeir Örlygsson, fyrrverandi forseti Hæstaréttar, Katrín S. Óladóttir, sérfræðingur í mannauðsmálum og framkvæmdastjóri Hagvangs, og Stefán Svavarsson, lektor og löggiltur endurskoðandi. Starfsmaður nefndarinnar er Heiðrún Pálsdóttir, ritari forseta Alþingis.
Undirnefnd forsætisnefndar og ráðgjafarnefndin starfa samkvæmt reglum sem forsætisnefnd hefur sett um gerð tillögu við kosningu ríkisendurskoðanda og umboðsmanns Alþingis.
