Hertar reglur um sótt­varnar­ráð­stafanir á lands­vísu tóku gildi á mið­nætti. Ríkis­stjórn Ís­lands kynnti reglurnar á blaða­manna­fundi í gær og verður nú­verandi reglu­gerð í gildi í þrjár vikur.

Eins og fram hefur komið verður tíu manna fjölda­tak­mörkun megin­regla og að­eins börn fædd 2015 og síðar verða þar undan­skilin. Grunn-, fram­halds-, tón­listar- og há­skólum verður lokað þar til páska­frí tekur við.

Þá rúmast marg­vís­leg starf­semi ekki innan reglu um tíu manna fjölda­tak­mörkun og verður hún stöðvuð. Heil­brigðis­ráð­herra byggði á­kvörðun sína um hertar reglur á til­lögum sótt­varnar­læknis. Líkt og Frétta­blaðið greindi frá greindust sau­tján smitaðir í fyrra­dag og voru þrír ekki í sótt­kví. Allir voru með breska af­brigðið svo­kallaða.

Helstu reglur sem taka gildi á miðnætti:

Nándarregla verður áfram 2 metrar og reglur um grímuskyldu óbreyttar. Sem fyrr verða börn fædd 2005 og síðar undanþegin grímuskyldu en falla undir fjölda- og nálægðartakmarkanir. Börn í leikskólum eru undanþegin 2 metra reglunni og fjöldatakmörkunum.

  • Almennar fjöldatakmarkanir 10 manns og ná til allra sem fæddir eru 2014 eða fyrr.
  • Trú- og lífsskoðunarfélög mega taka á móti 30 gestum við athafnir. Þeir skulu skráðir með nafni, kennitölu og símanúmeri en þurfa ekki að sitja í númeruðum sætum. Gestum er skylt að nota andlitsgrímur og tryggja skal 2 metra regluna. Hámarksfjöldi í erfidrykkjum, fermingarveislum og sambærilegum viðburðum er 10 manns.
  • Sund- og baðstaðir lokaðir.
  • Heilsu- og líkamsræktarstöðvar lokaðar.
  • Íþróttir inni og úti, jafnt barna og fullorðinna, sem krefjast meiri nálægðar en 2 metra eða þar sem hætta er á snertismiti vegna sameiginlegs búnaðar, eru óheimilar. 
  • Sviðslistir og sambærileg starfsemi, svo sem bíó, er óheimil.
  • Skemmtistaðir, krár, spilasalir og spilakassar lokaðir.
  • Ökunám og flugnám með kennara óheimilt.
  • Veitingastaðir mega hafa opið til kl. 22, með að hámarki 20 gesti í rými sem allir skulu skráðir og fá afgreiðslu í sæti sem eru númeruð. Vínveitingar skal bera til sitjandi viðskiptavina. Heimilt er að taka á móti nýjum gestum til kl. 21.00. 
  • Verslanir mega taka á móti 5 einstaklingum á hverja 10 m2 að hámarki 50 manns. 20 starfsmenn mega vera í sama rými og viðskiptavinir. Tveggja metra nándarregla og grímuskylda.
  • Starfsemi hársnyrtistofa, snyrtistofa og sambærileg starfsemi verður áfram heimil.