„Þegar snjórinn bráðnar er oft eitthvað rusl í honum“

Starfs­menn Reykja­víkur­borgar hafa staðið í ströngu í dag við að hreinsa frá niður­föllum vegna vatns­elgs sem víða hefur myndast í kjöl­far hlýrra veðurs og rigningar í dag. Hjalti Guð­munds­son skrif­stofu­stjóri reksturs og um­hirðu segir að starfs­fólk hafi farið snemma út í dag og sé úti að leita að stíflum og sé að hreinsa.

„Það eru að myndast pollar og vatns­elgur víða og þegar snjórinn bráðnar er oft eitt­hvað rusl í honum. Við þekkjum lág­punkta og á­kveðin vand­ræða­niður­föll,“ segir Hjalti sem á von á því að staðan verði svipuð alla helgina og starfs­fólk því á vakt.

Hann segir að hægt verði að senda inn á­bendingar á á­bendinga­vef Reykja­víkur­borgar og að vel verði fylgst með til­kynningum næstu daga. Hann segir að starfs­fólk borgarinnar reyni eftir fremsta megni að hreinsa það sem það getur en segir að hafi fólk á­hyggjur geti það til dæmis farið á vef borgar­vef­sjárinnar til að sjá hvar niður­föll eru við þeirra götur. Með því að skrá inn götu­heiti og svo velja inn í þekju­leit hol­ræsi og niður­föll og þá er hægt að sjá hvar þau eru stað­sett.

„Það er hægt að senda inn á­bendingar til okkar en ef fólk hefur miklar á­hyggjur þá á það auð­vitað bara að heyra í lög­reglu og þau senda slökkvi­liðið á vett­vang. Það er best,“ segir Hjalti að lokum.

Hvetja fólk í fyrirbyggjandi aðgerðir

Lárus Stein­dór Björns­son, varð­stjóri hjá slökkvi­liðinu á höfuð­borgar­svæðinu vonast til að mesti skaðinn í dag sé skeður. Hann í­trekar við fólk að moka frá niður­föllum svo vatn leki ekki í hús.

„Það eru búnar að koma um tíu til­kynningar um vatns­tjón sem við höfum farið í það sem af er degi. Ég held að mesti skaflinn sé búinn, en það er spurning núna þegar fólk er að koma heim eftir vinnu og fer að taka eftir vatns­tjóni heima hjá sér,“ segir Lárus og bætir við að vatns­lekarnir inn í hús hafi oftast verið minni­háttar.

„Það hefur gengið vel hjá okkur að takast á við vatns­el­ginn. En við þurfum að brýna fyrir fólki að moka, þar sem það er aftur vatns­veður á morgun. Fólk þarf að moka frá niður­föllum og aðrar fyrir­byggjandi að­gerðir, svo vatn leki ekki inn í hús,“ segir Lárus.