Hólmfríður Árnadóttir, formaður svæðisfélags Vinstri grænna á Suðurnesjum og oddviti Suðurkjördæmis segir að þó útlendingafrumvarpið fari óbreytt í gegn, þá ógni það ekki endilega ríkisstjórnarsamstarfinu. Hún segir að það sé erfitt að upplifa að unnið sé gegn grunngildum flokksins.
Hólmfríður, ásamt hópi innan Vinstri grænna skrifaði grein í síðustu viku, þar sem grasrót flokksins mótmælti útlendingafrumvarpi Jóns Gunnarssonar dómsmálaráðherra. Hópurinn telur að útlendingafrumvarpið einkennist af útlendingaandúð og það virðist hafa það eitt markmið að neita fleirum, enn hraðar, um hæli.
Hólmfríður segir að brugðist hafi verið við greininni með hádegisfundi á laugardaginn síðastliðinn, þar sem grasrótin átti gott samtal við forystufólk flokksins. Hún vill þó ekki meina að það sé ólga innan flokksins vegna frumvarpsins.
„Við álitum svo að það sé ekkert endilega ólga eða neitt slíkt, heldur einfaldlega erum við að sinna okkar hlutverki sem grasrót. Það er að minna stöðugt á okkar stefnu og eiga alltaf í stöðugu samtali við forystuna, sem við erum vissulega að reyna efla og hvetja til góðra verka,“ segir Hólmfríður.
Hólmfríður viðurkennir að hún hafi varla þorað að hugsa hvað gerist útlendingafrumvarpið verði samþykkt óbreytt.
„Ég vona svo sannarlega að okkar fólk grípi vel inn í og að við fáum þessu frumvarpi breytt, þannig að það fari ekki svona í gegn. Af því að við verðum líka að hlusta á þessi mannréttindasamtök sem eru að koma með umsagnir og annað slíkt og okkur ber skylda til þess að sinna þessum málaflokki vel. Við erum hluti af alþjóðasamstarfi og við erum með sáttmála í gildi hérna á Íslandi sem snúa að mannréttindamálum og mannréttindum. Þannig ég yrði allavegana mjög leið ef þetta færi svona í gegn svo ég tali fyrir mig,“ segir Hólmfríður og bætir við að í stjórnarsáttmálanum sé kveðið á um mannréttindi og að það eigi að standa vörð um þau.
„Eins er kveðið á um málefni innflytjenda og flóttafólks. Það er mikilvægt að standa við það sem stendur í stjórnarsáttmála, við eigum að taka vel á móti flóttafólki. Við viljum vera fjölmenningarsamfélag og okkur vantar fólk til landsins, til þess að vinna og annað slíkt,“ segir Hólmfríður.
Ef frumvarpið fer í gegn óbreytt, eru það ekki skilaboð til ykkar í grasrótinni að á ykkur sé ekki hlustað?
„Það er ein útfærslan. Ég trúi ekki öðru en að það sé á okkur hlustað og fólkið okkar fari fram með þeim hætti sem að er í takt við okkar stefnu. Það er bara þannig. og að það sé virkilega hlustað á þessar umsagnir og hlustað á grasrótina. Ég vona það og ég trúi því að það sé svo leiðis,“ segir Hólmfríður.
Er þetta mál þess eðlis að það geti ógnað samstarfi flokkana?
Ég bara veit það ekki. Nú er ég ekki á þingi og ekkert í framlínunni hvað það varðar, þannig ég veit það ekki. En ég er ekki að sjá það endilega. Vissulega ber okkur í grasrótinni að halda málefnum á lofti, sérstaklega málefnum minnihluta og mannréttinda,“ segir Hólmfríður.
Hún trúir því að frumvarpið fari ekki í gegn óbreytt.
„Það er alveg vissulega erfitt þegar maður upplifir að það sé verið að vinna gegn okkar grunngildum. En ég hef trú á að þetta fari ekki svona í gegn og að það verði unnið betur í þessu frumvarpi,“ segir Hólmfríður.
