Ólafur Þ. Harðarson, prófessor í stjórnmálafræði við Háskóla Íslands, telur það afar ólíklegt að öll atkvæði sem voru greidd í Alþingiskosningunum verði talin aftur alls staðar á landinu en endurtalning fór fram í gær í Norðvesturkjördæmi og stendur nú yfir í Suðurkjördæmi.
Í Kastljósinu á RÚV í kvöld fóru Ólafur og Tómas Hrafn Sveinsson, lögmaður og fyrrverandi formaður kjörstjórnar í Reykjavík, yfir málin. Aðspurðir um stöðuna sögðust þeir bæði ekki muna eftir öðru eins og því sem stendur nú yfir.
„Nei, ég man ekki eftir því. Ef þú ert að spyrja hvort ég hafi áður séð það að klukkan níu séu fimm jöfnunarmenn inni en klukkan eitt séu þeir farnir út og aðrir fimm komnir í staðinn, þá hef ég aldrei séð það áður,“ sagði Ólafur í svari sínu við spurningu þáttastjórnandans Sigríðar Hagalín. Hann segir að það myndi koma sér á óvart ef hið sama myndi gerast í Suðurkjördæmi.
Allt kerfið ónýtt vegna mannlegra mistaka
Líkt og áður segir stendur nú yfir endurtalning í Suðurkjördæmi en fimm flokkar fóru fram á að atkvæðin yrðu talin aftur eftir að endurtalningu lauk í Norðvesturkjördæmi. Ólafur segir þó nánast engar líkur að talið verði aftur á landinu öllu þrátt fyrir að margir landsmenn hneykslist á stöðu mála.
„Ég hef verið að fylgjast með umræðunni í dag og hef nú svona orðið svolítið undrandi, það er eins og menn séu að tala um það að vegna þess að það hafi orðið mistök í einu kjördæmi, mannleg mistök sem alltaf geta gert, þá sé bara kerfið í rúst og allt sé ónýtt,“ sagði Ólafur.
Hægt að gera athugasemdir við mikilvægari hluti
Að hans sögn er aðalatriðið í kosningakerfinu að vilji kjósenda speglist með réttum hætti í fulltrúum. Vísaði hann til þess að eftirlitsmenn ÖBE hafi áður fylgst með kosningum hér á landi, þó ekki þeim í ár, og komist að þeirri niðurstöðu að framkvæmd kosninga á Íslandi sé með því besta sem gerist í heiminum. Þeir hafi þó vissulega gert athugasemdir við nokkra hluti.
„Þeir hafa gert athugasemd um hlut sem skiptir miklu meira máli heldur en til dæmis innsigli á kjörkössum, þó þau skipti máli, þeir hafa gert athugasemdir við vægi atkvæða í íslenska kosningakerfinu og Alþingi hefur bara ekki hlustað á það,“ sagði Ólafur en hann sagði það vera mun mikilvægari athugasemd en þá sem hefur verið gerð í ár.
Að lokum var Ólafur spurður út í þau tilfelli þar sem kosningar voru ógiltar hér á landi, einu sinni snemma á 20. öld á Seyðisfirði þar sem kosið var aftur ári seinna, og einu sinni á þessari öld þegar Hæstiréttur ógilti kosningu til stjórnlagaráðs þar sem kært var fyrir ýmis tækniatriði í framkvæmdinni.
Aðspurður um hvort það væru einhverjar líkur á að Alþingi myndi ógilda kosninguna í ár var svar Ólafs einfalt. „Nei,“ sagði Ólafur staðfastlega.
