Clarence Dixon, 66 ára fangi á dauða­deild í Arizona í Banda­ríkjunum, var tekinn af lífi í gær­kvöldi. Þetta er fyrsta af­takan sem yfir­völd í Arizona fram­kvæma í tæp átta ár. Dixon var dæmdur til dauða fyrir morðið á hinni 21 árs gömlu Deana Bowdoin árið 1978.

Verj­endur Dixon reyndu allt fram á síðustu stundu að fá af­tökunni frestað en án árangurs. Reyndu þeir að færa rök fyrir því að Dixon væri með þroska­skerðingu og hefði engan skilning á því hvers vegna yfir­völd vildu taka hann af lífi.

Dixon var þegar að af­plána lífs­tíðar­fangelsis­dóm fyrir nauðgun þegar spjótin beindust að honum í rann­sókn lög­reglu á morðinu á Bowdoin. Hún fannst látin í íbúð sinni í Tempe, út­hverfi Phoenix, og leiddi rann­sókn lög­reglu í ljós að henni hafði verið nauðgað áður en hún var stungin til bana.

Af­takan í gær var sú fyrsta í Arizona síðan í júlí 2014 þegar Joseph Wood var tekinn af lífi fyrir morð á fyrr­verandi unnustu sinni og föður hennar.

Í júlí næst­komandi stendur til að taka annan fanga af lífi í Arizona, Frank Atwood að nafni, en hann var sak­felldur fyrir morð á átta ára stúlku, Vicki Lyn­ne Hoskin­son, árið 1984.