Talsvert hefur borið á hálkuslysum á bráðamóttöku Landspítalans það sem af er degi.

Mörg slysanna eru enn í vinnslu að sögn Helgu Rósu Másdóttur, deildarstjóra bráðamóttökunnar.

„Þetta eru allskonar verkir, í ökklum, höndum og mjöðmum,“ segir Helga Rósa um áverka þeirra sem eru að koma vegna hálkunnar.

Þá séu sumir með skurði á höfði eftir að hafa dottið aftur fyrir sig.

Rúmlega 60 manns eru nú á bráðamóttökunni að sögn Helgu Rósu en um helmingur þeirra eru sjúklingar sem bíða eftir að leggjast inn á aðrar deildir.

Lögreglan á höfuðborgarsvæðinu varaði við flughálku á höfuðborgarsvæðinu nú í morgunsárið á Facebook-síðu sinni.

Hún segir ökutæki og starfsmenn borgarinnar sem sjái um söltun á götum hafa átt í erfiðleikum vegna hálkunnar og bað fólk um að fara varlega.