Rúna Hauksdóttir Hvannberg, forstjóri Lyfjastofnunar, segir að það sé áhyggjuefni að það sé skortur á sýklalyfjunum Aritomycin og Zitromax hérlendis um þessar mundir. Lyfjastofnun fylgist náið með stöðunni og hefur gripið til aðgerða.
„Stærsti hlutinn af vinnunni okkar fer í að koma í veg fyrir lyfjaskort. Það er töluvert mikil vinna sem við vinnum með heildsölum í landinu. En þetta er alltaf áhyggjuefni og það er lyfjaskortur í Evrópu,“ segir Rúna.
Meðal þeirra aðgerða sem Lyfjastofnun hefur gripið til er að veita heimild fyrir notkun undanþágulyfja. Rúna segir að með því sé hægt að mæta skortinum en fólk getur þannig notað lyfseðlana sem það á og fengið undanþágulyf.
Aðspurð segir hún einnig skort á svefnlyfjum á Íslandi en unnið er eða því að fá fleiri svefnlyf send með flugi.
„Það er skortur á Stilnoct, báðum pakkningastærðum, það er töluvert mikil svefnlyfjanotkun á Íslandi ég veit ekki hvort notkun hafi farið umfram það sem var gert ráð fyrir í birgðahaldi. En það er verið að reyna ná þessum svefnlyfjum inn með flugi en eins og allir vita hafa samgöngur yfir hátíðirnar verið eins og þær hafa verið,“ segir Rúna.
„Þetta er auðvitað bagalegt fyrir þá sem eru að leysa út en þetta eru lyf sem á nota eftir þörfum og það er verið að horfa á að ná þessu inn með flugsamgöngum. Þó þetta sé komið í skort í heild sinni getur þetta verið til í einhverjum apótekum en það er verið að huga að flugflutningum,“ segir Rúna.
Lyfjastofnun og Tollgæslan tóku þátt í umfangsmikilli aðgerð Europol, Operation Shield III, þann 19. desember í fyrra. Það kemur fram í tilkynningu frá Lyfjastofnun í dag en hérlendis var meðal annars lagt hald á steratengd efni, stinningarlyf, og sterk verkjalyf eins og oxíkontín. Greint var frá aðgerðinni í dag.
Spurð um þessa aðgerð segir Rúna Tollgæsluna bera ábyrgð á henni en Lyfjastofnun sé kölluð til sem sérfræðingar.
„Við erum þarna sérfræðingar til að meta magnið umfram það sem er leyfilegt að koma til landsins. Við ráðleggjum þeim við aðgerðirnar þar sem við höfum lyfjafræðikunnáttuna og vitum hvað má koma til landsins og í hvaða magni," segir Rúna.
Í tilkynningu Lyfjastofnunar segir að Europol hafi stýrt alþjóðlegu aðgerðinni Operation Shield III en hún beindist gegn ólöglegum lyfjum og steratengdum efnum.
Hald var lagt á lyf að andvirði rúmlega 40 milljóna evra á heimsvísu, fimmtíu og níu glæpahópar voru leystir upp, og tíu ólöglegum rannsóknarstofum lokað. Hérlendis var meðal annars lagt hald á steratengd efni, stinningarlyf, og sterk verkjalyf eins og oxíkontín.
