„Flóttafólk frá Úkraínu hefur gengið í gegnum ólýsanlegar hörmungar og því er mikilvægt að við tökum á móti þeim á mannúðlegan hátt. Það er ekki á það bætandi að þurfa að skilja við dýrin sín við þessar aðstæður.“ segir Svandís Svavarsdóttir matvælaráðherra sem hefur ákveðið að veita undanþágu frá gildandi banni við innflutningi gæludýra frá Úkraínu.

Ráðherra hefur fengið umsögn Matvælastofnunar um málið og hefur ráðuneytið leitað til þeirra einangrunarstöðva sem starfa á landinu og ríkir þar góður vilji til að finna viðeigandi lausnir. Frá þessu er greint í tilkynningu frá Matvælaráðuneytinu.

Gert er ráð fyrir að um 1 prósent fólks sem nú flýr stríðið í Úkraínu hafi með sér gæludýr sín á flóttanum. Til að bregðast við þeirri stöðu á mannúðlegan hátt hefur matvælaráðuneytið kannað hvort hægt sé að taka á móti þeim dýrum sem fylgja eigendum sínum til Íslands.

Á fundi yfirdýralækna á Norðurlöndum sem haldinn var nýverið var mælst til að aðildarríki ESB væru sveigjanleg við móttöku gæludýra flóttafólks frá Úkraínu. Í framhaldinu hafa mörg Norðurlandanna veitt undanþágur.

Nokkur skilyrði sett

Í tilkynningunni kemur fram að setja þurfi nokkur skilyrði fyrir undanþágunni meðal annars vegna þess að útbreiðsla hundaæðis er talsverð í Úkraínu en hundaæði hefur aldrei greinst á Íslandi.

Eitt af skilyrðum þessarar undanþágu er að dýr sé flutt beint á einangrunarstöð við komu til landsins og fái strax almenna heilbrigðisskoðun dýralæknis. Ef dýr er ekki örmerkt skal það merkt af dýralækni.

Einnig verða óbólusett dýr bólusett gegn hundaæði og mótefni mæld 30 dögum síðar. Ef niðurstöður eru fullnægjandi skal dýr vera áfram í einangrun í 3 mánuði og það jafnframt meðhöndlað gegn innri og ytri sníkjudýrum að lágmarki tvisvar.