Katrín Jakobsdóttir forsætisráðherra var í sama flugi og Sindri Þór Stefánsson sem strauk úr fangelsinu að Sogni í nótt. Um var að ræða flug til Svíþjóðar, en Katrín verður þar viðstödd leiðtogafund Norðurlandanna og forsætisráðherra Indlands.

RÚV greinir frá málinu og hefur eftir farþega að Katrín hafi verið á almennu farþegarými – en að fólk hafi ekki tekið eftir neinu óeðlilegu í fluginu. Forsætisráðuneytið vildi ekki tjá sig við RÚV þegar eftir því var leitað. 

Katrín birti í dag færslu á Twitter þar sem hún birtir mynd af sér með Shri Narendra Modi, forsætisráðherra Indlands.

Líkt og greint hefur verið frá strauk Sindri úr fangelsinu um klukkan eitt í nótt, og hófst leit að honum í morgunsárið. Meðal annars var leitað um borð í flugvélum og voru farþegar beðnir um að afhenda persónuskilríki til þess að gera grein fyrir sjálfum sér. Ljóst var nú síðdegis að Sindra hefði tekist að komast um borð í vél til Svíþjóðar með fölsuðum skilríkjum.