Sindri Þór Stefánsson, fanginn sem strauk úr gæsluvarðhaldi af Sogni í nótt, flúði land á fölsuðum skilríkjum til Svíþjóðar í morgun að því er fram kemur í tilkynningu lögreglu.

Sindri lagði á flótta af Sogni um klukkan eitt í nótt en lögreglu barst ekki tilkynning fyrr en um klukkan átta í morgun. Var hann þá floginn til Arlanda-flugvallar í Stokkhólmi á skilríkjum annars manns, en myndbandsupptökur af vellinum staðfesta það.

Búið er að gefa út alþjóðlega handtökuskipun á hendur honum og vinnur lögreglan á Suðurnesjum náið með lögregluyfirvöldum ytra til þess að hafa uppi á honum.

Fréttablaðið greindi frá því í morgun að lögregla hefði farið um borð í flugvélar á Keflavíkurvelli í þeim tilgangi að leita að Sindra.

Fréttin hefur verið uppfærð.