„Mér varð litið inn í heima­banka appið mitt og rak þá augun í nýja rukkun frá fé­lagi sem ég kannast ekki við. Fer að gúgla og átta mig á að þetta er rukkun fyrir bíla­stæði,“ segir sjón­varps­konan Lóa Pind Al­dísar­dóttir í Face­book færslu.

Lóa segist hafa farið að gosinu strax á fyrsta degi, hún hafi lagt í hann nokkrum klukku­tímum eftir að sprungan opnaðist.

„Hvergi sá ég skilti eða upp­lýsingar um að við yrðum rukkuð um nærri 5000 krónur fyrir að leggja bílnum á mölinni,“ segir Lóa en hún fékk rukkun upp á 4.750 krónur frá Land­eig­enda­fé­lagi Hrauns sf.

„Er ekki lág­mark að fólk sé upp­lýst um að það sé að kaupa sér þjónustu?“ spyr Lóa.

Þá er Lóu bent á að ef greitt er við stæðin sé bíla­stæða­gjaldið einungis 1000 krónur, það hækki hins vegar ef greitt er eftir á. „Þetta er vel merkt við inn­ganginn á bíla­stæðin,“ segir einn í at­huga­semd við færsluna.

„Það er alla­vegana ekki betur merkt en svo að það fór alveg fram hjá mér,“ segir Lóa og bætir við að henni finnist það ansi hraust­leg hækkun að fara úr 1000 krónum upp í 5000 krónur ef maður borgar tveimur dögum seinna.

„Bara svo ég taki það fram, að ef land­eig­endur hafa borið kostnað af því að leggja stíga, þá finnst mér sjálf­sagt að greiða fyrir það en það truflaði mig að hafa ekki haft hug­mynd um að þetta væru gjaldatæði,“ segir Lóa sjálf í færslu við at­huga­semdina.