Lögreglan handtók strætóbílstjóra sem var að keyra leið 14 seinni partinn í dag. Samkvæmt upplýsingum frá lögreglu er maðurinn grunaður um líkamsárás gegn 11 ára barni. Hann er nú í haldi lögreglu. Atvikið átti sér stað í Gnoðarvogi og var maðurinn handtekinn við Hlemm.

Maðurinn á að hafa stöðvað vagninn þegar barnið kastaði snjóbolta í hann. Hann gekk þá út úr vagninum og er sakaður um að hafa ráðist að barninu þar. 

Guðmundur Heiðar Helgason, upplýsingafulltrúi Strætó, staðfesti það í samtali við Fréttablaðið að maðurinn hafi verið handtekinn. Guðmundur sagði að á þessu yrði tekið hjá Strætó og að hann treysti því að lögregla myndi sinna sínu hlutverki. 

Guðmundur sagði verktakafyrirtæki sjá um akstur leiðar 14 og það væri verið að vinna í því að finna nýjan bílstjóra. En farþegar voru skildir eftir í vagninum án bílstjóra. 

Fréttin verður uppfærð þegar frekari upplýsingar fást.