Leið 36 hjá Strætó lenti í árekstri á Nýbýlavegi við Þverbrekku á níunda tímanum í morgun. Einhverjar tafir urðu vegna árekstursins en þó ekki miklar.
Engan sakaði í árekstrinum að sögn Guðmundar Heiðars Helgasonar, upplýsingafulltrúa Strætó, og þá sagði Gunnar Hilmarsson, aðalvarðstjóri, að málið hafi ekki ratað á borð lögreglu.
Um var að ræða minniháttar óhapp og var Akstur og Öryggi kallað á vettvang til að taka niður skýrslu.
„Þegar bílstjórar lenda í óhappi eiga þau að stoppa og láta taka skýrslu líkt og var gert í þessu tilviki,“ segir Guðmundur. Hann sagði óhappið ekki hafa verið alvarlegt og lítið af skemmdum hafa orðið enda hafi vagninn sem um ræðir lagt aftur af stað fyrir nokkrum mínútum.
