„Ég er bæði mjög ánægð og þakklát. Við vorum að leita réttlætis og ég lít á þetta sem stórsigur fyrir Grant og fjölskyldu okkar,“ segir Roslyn Wagstaff, ekkja Grants Wagstaff, en henni og þremur barna þeirra Grants voru í gær dæmdar miskabætur vegna andláts eiginmanns hennar, sem fórst í flugslysi hér á landi.

Roslyn voru dæmdar rúmar 3,4 milljónir í miskabætur úr hendi Arngríms Jóhannssonar og Sjóvá-Almennum, en bótakröfu hennar vegna missis framfæranda, upp á rúmar 35 milljónir, var vísað frá dómi. Þrjú börn þeirra hjóna fá hvert um sig dæmdar 2 milljónir í bætur.

„Ég mun ásamt Arngrími fara næstu daga yfir dóminn og forsendur hans,“ segir Friðrik Smárason lögmaður Arngríms. Hann bendir á að ekki hafi verið fallist á dómkröfur stefnenda í veigamiklum atriðum en að öðru leyti sé ótímabært að bregðast við niðurstöðunni.

„Málið hefur verið Arngrími þungbært, ofan á vanlíðan sem fylgir afleiðingum sjálfs slyssins. Ég bið fjölmiðlafólk og aðra að sýna því skilning,“ segir Friðrik.

Í dóminum er Arngrími metið til gáleysis að haga flugi inn Barkárdalinn án nægrar aðgæslu varðandi yfirvofandi hættu á blöndungs­ísingu og bregðast síðan ekki rétt við er flugvélin varð fyrir gangtruflunum, með því að snúa vélinni ekki við án tafar.

Til að afkomendur eigi rétt á miskabótum vegna dauða manns, þarf skilyrði skaðabótalaga um ásetning eða stórfellt gáleysi að vera uppfyllt, og hafa dómstólar beitt nokkuð ströngu sakarmati í tilvikum banaslysa í samgöngum, sérstaklega í tilviki farþega og gangandi vegfarenda, að því er fram kemur í dóminum.

Á þessum grunni er Arngrímur sagður hafa sýnt af sér stórfellt gáleysi í aðdraganda nauðlendingarinnar og vísað sérstaklega til „þess aðgæsluleysis að átta sig ekki á því hve flugvélin var komin neðarlega fyrr en svigrúm til að nauðlenda henni var orðið svo takmarkað að hún lenti í stórgrýttri urð sem telja verður hafa stóraukið hættu á að eldsneytistankar vélarinnar rifnuðu með þeirri hættu sem því fylgdi.“

En fram hefur komið að Grant lifði brotlendinguna af, en ekki eldsvoðann sem braust út eftir lendinguna.

Þá kemur einnig fram í dóminum að ekki komi til greina að lækka bætur vegna eigin sakar Grants. Hann hafi verið farþegi í vélinni og þátttöku hans í flugferðinni verði á engan hátt jafnað til verka stefnda sem flugmanns.

„Aðrir verða ekki dregnir til ábyrgðar á hvernig stjórnandanum tekst til við stjórnina, á meðan viðkomandi grípur ekki beinlínis inn í, sem Arthur Grant gerði ekki,“ segir í dóminum.

Eins og móðir þeirra eru börn Grants einnig ánægð með niðurstöðuna, þrátt fyrir að bætur séu mun lægri en krafist var í málinu.

Jón Páll Hilmarsson, lögmaður systkinanna þriggja, hafði náð tali af Söruh Louise Wagstaff, eftir að dómur var kveðinn upp í gær.

„Hún er mjög glöð yfir að þessu sé lokið og að dómur hafi fallið þeim í vil. Þótt bæturnar séu lágar, segir hún aðalatriðið að dómurinn hafi fallið með þessum hætti og þau fengið þessa viðurkenningu,“ hefur Jón eftir Söruh.