Í dag er útlit fyrir suðaustan 13-20 m/s um landið sunnan- og vestanvert, en 18-25 m/s undir fjöllum og með suður- og vesturströndinni síðdegis. Það verða suðaustan 5-13 m/s norðan- og austanlands. Sums staðar verður dálítil úrkoma sunnantil, en það verður bjartviðri fyrir norðan. Hiti verður 0 til 5 stig sunnan- og vestantil, en annars verður vægt frost.

Í nótt lægir og á morgun verða suðaustan 8-13 m/s og rigning eða slydda um landið SA-vert, en þurrt N-lands og annars úrkomulítið. Hiti verður víða 0 til 5 stig að deginum, en það verður vægt frost á stöku stað.

Gular viðvaranir vegna storms

Gul viðvörun er í gildi á Suðurlandi frá 17 til 6 í fyrramálið og á Faxaflóa frá 20 til 9 í fyrramálið. Búist er við stormi með snörpum vindhviðum við fjöll. Varasamt getur verið að vera á ferðinni, sérstaklega fyrir ökutæki sem taka á sig mikinn vind, þar sem hálka getur verið á vegum. Fólk er hvatt til að sýna aðgát og ganga frá lausum munum til að forðast tjón.

Í hugleiðingum veðurfræðings kemur fram að það verði hvassast undir Eyjafjöllum, á Kjalarnesi og við Hafnarfjall. Þar gæti meðalvindur náð 25 m/s og hviður farið yfir 35 m/s. Lítil úrkoma fylgir storminum og hitinn verður yfir frostmarki, svo að hálka á láglendi verður mjög lítil.

Í nótt og á morgun lægir en á sunnudag er gert ráð fyrir annarri lægð og nýjustu spár gera ráð stormi þá líka og það gæti jafnvel orðið heldur hvassara en í dag. Henni fylgir líka rigning en líklegt er að veðrið gangi yfir á nokkrum tímum yfir hádaginn.

Færð og ástand vega

Samkvæmt Vegagerðinni er vetrarfærð í öllum landshlutum en það er þó greiðfært á köflum um suðvestan- og vestanvert landið. Flughált er á nokkrum leiðum.

Veðurhorfur á landinu næstu daga

Á laugardag:

Suðaustan 8-15 m/s, hvassast á Suðausturlandi. Rigning eða slydda á láglendi á suðurhelming landsins, en yfirleitt hægari og þurrt á norðanverðu landinu. Hiti 1 til 5 stig, en um frostmark norðanlands.

Á sunnudag:

Gengur í suðaustan storm, fyrst um landið SV-vert. Talsverð rigning og sums staðar slydda, en lengst af þurrt nyrðra. Lægir undir kvöld, en áfram hvasst A-til. Hiti 1 til 6 stig.

Á mánudag:

Suðaustlæg átt og úrkoma A-til, en annars víða þurrt. Hiti nálægt frostmarki.

Á þriðjudag:

Austan átt, él fyrir norðan og austan, en annars þurrt að kalla. Frost um mest allt land.

Á miðvikudag:

Austan og síðar norðaustanátt. Él fyrir norðan og frost, en slydda syðst og hiti um frostmark.

Á fimmtudag:

Útlit fyrir norðanátt með éljum um landið N-vert, en bjart á köflum syðra. Hiti breytist lítið.