„Vakin er athygli á að um hádegi gengur í suðvestan storm með éljum á suðurlandsundirlendinu. Færð og skyggni gæti versnað til muna, en veðrið gengur hratt yfir.“ Þetta er athugasemd veðurfræðings á vef Veðurstofu Íslands.

Gul stormviðvörun er í gildi fyrir suðvesturhornið. „Gengur í suðvestan 13-20 m/s með dimmum éljum eða snjókomu og skafrenningi. Léleg aksturskilyrði og almennt slæmt ferðaveður á Suðurlandi, bæði á Suðurstrandavegi, Hellisheiði og Suðurlandsvegi austur að Mýrdal.“

Veðrið næsta sólarhringinn verður þannig að upp úr hádegi gengur í suðvestan hvassviðri eða storm á Suðurlandi, með éljum og síðan slydduéljum. Dregur úr vindi seinnipartinn. Allhvöss sunnanátt verður norðaustanlands í kvöld og léttir til. Frost verður á bilinu 0 til 8 stig, kaldast fyrir norðan.

Á morgun verður vestlæg átt, 8 til 15 metrtar á sekúndu suðvestanlands en annars mun hægari. Víða verða él en yfirleitt léttskýjað á norðaustanverðu landinu. Frost verður á bilinu 1 til 10 stig.

Uppfært klukkan 11:40: 

Óveðrið afturkallað

„Sjá má glögglega á ratsjá og tunglmyndum að lægðin með snjó og vindi stefnir til austurs skammt fyrir sunnan land í stað þess að koma inn á Faxaflóa eins og áður var reiknað með. Hittir mögulega á Eyjafjöll og Mýrdal seinnipartinn.   Spá um hríð og skafrenning suðvestan- og og sunnanlands er því afturkölluð.“