Eldgos hófst í Meradölum á Reykjanesi miðvikudaginn 3. ágúst þegar kvika náði upp á yfirborðið. Dagana á undan höfðu verið miklar jarðhræringar á svæðinu sem fundust víðs vegar um landið og var stærsti skjálfti hrinunnar þann 31. júlí og mældist hann 5,4 að stærð.

Almannavarnir biðluðu strax til almennings um að fara ekki að gosstöðvunum og að þau sem gerðu sér ferð þangað færu sérstaklega varlega. Fólk streymdi að svæðinu þrátt fyrir tilmælin og strax að kvöldi fyrsta dags gossins voru um 1.200 manns á svæðinu. Leiðin að gosinu er löng og grýtt og fyrstu dagana sem gosið stóð yfir þurfti fjöldi fólks á aðstoð björgunarsveita og lögreglu að halda.

Fréttablaðið/Ernir

7. ágúst var gosstöðvunum lokað vegna veðurs og þær ekki opnaðar að nýju fyrr en 10. ágúst. Dagana sem svæðið var lokað þurfti lögregla að beina fjölda fólks frá svæðinu og þegar það var opnað aftur var tekin ákvörðun um að banna börnum undir tólf ára að ganga að gosinu.

Jarðeðlisfræðingar og eldgosa­fræðingar telja gosið nú öflugra en síðasta gos á Reykjanesi og að það gæti staðið yfir í langan tíma. Hraunið stefndi um tíma í átt að Suðurstrandarvegi og margar sviðsmyndir eru af því hvernig framganga gossins og hraunflæðisins þróast. Ein þeirra svartari er sú að hraunið fræði yfir Suðurstrandar­veg á næstu tveimur vikum. Hraunið rann í gær til norðurs en ekki í átt að Suðurstrandarvegi eins og dagana á undan.

Gæti orðið þoka í dag

Búast má við að margir leggi leið sína í Meradali um helgina til að berja gosið augum og í dag má búast við fremur hægri suðlægri átt og ágætis hitatölum. Mikill raki er þó í loftinu og gæti myndast þoka þegar líða tekur á daginn og um kvöldið. Á morgun snýr vindáttin í norður og samkvæmt veðurfræðingi á Veðurstofu Íslands verður að öllum líkindum bjart á svæðinu, en þau sem ganga að gosinu munu gera það með vindinn í fangið. Með norðanáttinni kólnar og því er mikilvægt að klæða sig vel. n

Fréttablaðið/Ernir
Fréttablaðið/Ernir
Fréttablaðið/Ernir
Fréttablaðið/Ernir