Á milli 74 prósent og 91 prósent Íslendinga eru hlynnt afsögn alþingismannanna sex í kjölfar umdeildra samskipta sem hljóðritaðar voru þann 20. nóvember síðastliðinn á Klaustur bar. Þetta kemur fram í könnun sem Maskína lét gera dagana 30. nóvember til 3. desember.

Flestum finnst að Gunnar Bragi Sveinsson, þingmaður Miðflokksins, eigi að segja af sér en næstum jafn háu hlutfalli finnst að Bergþór Ólason eigi einnig að gera það, eða 90 prósent. Rétt innan við þremur af hverjum fjórum finnst að Anna Kolbrún Árnadóttir, einnig þingmaður Miðflokksins, eigi að segja af sér þingmennsku en það er lægsta hlutfallið. 

Þá finnst 86 prósent að Sigmundur Davíð Gunnlaugsson eigi að gera slíkt hið sama. Hvað varðar fyrrverandi þingmenn Flokks fólksins telja 85 prósent að Karl Gauti Hjaltason eigi að segja af sér og 82 prósent að Ólafur Ísleifsson eigi að gera það. Það er því ljóst að í öllum tilvikum finnst miklum meirihluta landsmanna að þingmennirnir ættu að hverfa til annarra starfa.

Í öllum tilvikum eru konur hlynntari afsögn þingmannanna en karlar. Þeir sem eru eldri en 50 ára eru umburðarlyndari gagnvart því að þingmennirnir séu áfram á þingi því 8-16 prósent þeirra eru andvíg því að þeir segi af sér en 2-10 prósent í öðrum aldurshópum.

Milli 86 prósent og 87 prósent Íslendinga finnst það hafa verið rétt ákvörðun fjölmiðla að birta upplýsingarnar úr upptökunni á móti rúmlega 10 prósent sem þótti ákvörðunin röng. Marktækur munur er á viðhorfi karla og kvenna, en konum finnst ákvörðunin hafa verið rétt í um 90 prósent tilvika samanborið við rúmlega 83 prósent karla. Kjósendur Miðflokksins skera sig einnig mikið úr hér því um 92 prósent þeirra finnst ákvörðunin röng.

Könnun Maskínu.