Landeigandi nokkur að Seljanesi á Ströndum, Elías S Kristinsson, stillti sér upp fyrir framan beltagröfu á Ófeigsfjarðarvegi í gær og stöðvaði þannig framkvæmdir verkamannsins sem starfaði þar í umboði VesturVerks eins og Fréttablaðið greindi frá í gær. VesturVerk hóf þannig framkvæmdirnar þrátt fyrir kæruna sem landeigendur Drangavíkur lögðu fram gegn framkvæmdaleyfi þeirra.

„Hann má nú eiga það, gröfumaðurinn, að hann var ljúfur sem lamb og mjög kurteis. Hann hætti strax störfum eftir að ég sagði honum að ég myndi ekki færa mig af veginum,“ sagði Elías í samtali við Fréttablaðið í dag. Hann brunaði beint á staðinn í gærkvöldi eftir að hann fékk veður af því að framkvæmdirnar væru hafnar.

Elías stöðvaði framkvæmdirnar einn síns liðs í gær.

„Mér finnst þetta alveg ótrúleg ósvífni, að daginn eftir að það kemst upp að þeir eigi ekki stóran hluta af vatnssvæðinu sem þeir þurfa að þá hefji þeir framkvæmdir,“ segir Elías. „Allir eðlilegir menn hefðu ákveðið að bíða eftir að fá úr þessum málum skorið. Þetta sýnir bara hvað þetta er ósvífið lið.“

Elías segir verktakann á gröfunni þá hafa staðfest við sig að Gunnar Gaukur Magnússon, framkvæmdastjóri VesturVerks, hafi sent hann af stað í framkvæmdirnar kvöldið áður, sama dag og landeigendur lögðu kæruna fram. „Ætlun þeirra er að eyðileggja eins mikið og hægt er í sumar svo að það verði ekki hægt að hætta við virkjunina. Þessir menn hugsa bara um peninga og hlutabréfin sín og svífast bara einskis,“ heldur Elías áfram.

Hann segir þó að sem betur fer hafi grafan í gær ekki framið neinar skemmdir á landsvæðinu heldur aðeins lagað hluta vegarins. „En það er ekki það sem skiptir máli því þetta er bara einn liður í framkvæmdum á veginum. Það stendur til að grafa hérna skurði úti um allt við veginn til að þurrka hann upp og það er þar sem skemmdirnar byrja á náttúrunni.“

Elías segist þá ekki vita hvort verktakinn hafi verið við framkvæmdir á veginum í dag því hann hafi sjálfur ekki komist á svæðið; hann hefur verið á veiðum í allan dag. „Ég ætla að kíkja þarna á eftir þegar ég kem í land,“ segir hann og staðfestir þá að hann muni stöðva framkvæmdirnar á ný séu þær enn í gangi.