Fyrirtækið Tæknivörur tryggði sér merki Stjörnutorgs á uppboði og mun færa Íþróttafélagi Stjörnunnar í Garðabæ þar sem merkið verður komið fyrir á torgi Stjörnumanna. Skiltið var selt fyrir 200.000 krónur og mun allur ágóði renna óskiptur í pakkasöfnun Kringlunnar.
Stjörnutorgi Kringlunnar var formlega lokað í nóvember sl. þegar allri þriðju hæðinni var breytt og við tók veitingasvæðið Kúmen. Við það tilefni bauð Kringlan merki Stjörnutorgs á uppboði og var allur ágóði ánafnaður pakkasöfnun Kringlunnar til styrktar Mæðrastyrksnefnd og Fjölskylduhjálp Íslands.
Það voru jólaálfar Kringlunnar ásamt markaðsstjóra Kringlunnar, Baldvinu Snælaugsdóttur, sem tóku við styrknum og afhentu um leið skiltið.
Við pakkasöfnun Kringlunnar eru viðskiptavinir hvattir til að kaupa eina aukagjöf og setja hana í söfnunina við jólatréð í Kringlunni. Einnig er hægt að styrkja söfnunina með framlagi á heimasíðu Kringlunnar. Jólaálfarnir munu síðan safna saman ágóðanum og skottast í verslanir Kringlunnar til að kaupa gjafir handa börnum sem á þurfa að halda.
Pakkasöfnunin hófst í byrjun desember og hafa margir lagt henni lið. Að sögn Baldvinu er söfnunin í ár þó töluvert dræmari en í fyrra eða um það bil 30% minni og er það áhyggjuefni þar sem síst færri fjölskyldur reiða sig á aðstoð hjálparsamtaka um þessi jól. Baldvina bendir á að framlög þurfa ekki að vera há til að gera mikið gagn og að allt safnist sem saman kemur.
