Eigandi 52 milljóna króna lottóvinningsmiða sem auglýst hefur verið eftir undanfarið er fundinn. Miðann keypti maðurinn í Póló við Bústaðaveg í Reykjavík um miðjan febrúar, og lýsti Íslensk getspá eftir honum í fjölmiðlum fyrr í þessum mánuði. Hann varð steinhissa þegar hann lét fara yfir nokkra lottómiða í Olís við Ánanaust á dögunum enda hafði hann gleymt því að hafa hafa keypt sér miða í Póló. 

 „Kannski kaupi ég mér íbúð,“ sagði vinningshafinn þegar Íslensk getspá innti hann eftir svörum um hvort hann sé farinn að láta hugann reika um ráðstöfun á vinningnum. „En svo verður maður nú að leyfa sér eitthvað skemmtilegt líka,“ sagði hann enn fremur. 

Í tilkynningu óskar Íslensk getspá þessum nýja milljónamæringi innilega til hamingju.