Ó­við­unandi staða sem geti ógnað öryggi íbúa

Almannavarnanefnd Vestmannaeyja lýsir yfir alvarlegum áhyggjum af þeirri stöðu sem uppi er varðandi þyrlur Landhelgisgæslunnar.

Verkfall flugvirkja hefur nú staðið yfir frá 5. nóvember en ekkert miðar í viðræðum þeirra um nýjan kjarasamning. Fyrir liggur að frá og með miðnætti á morgun verður engin þyrla til taks hjá Landhelgisgæslunni í að minnsta kosti tvo daga.

„Þetta er með öllu óviðunandi og getur ógnað öryggi íbúa í Vestmannaeyjum og sjófarenda ekki síst í því ljósi að veðurspá fyrir næstu daga er slæm og við búið að samgöngur milli lands og Eyja geti raskast verulega af þeim sökum,“ segir í færslu á Facebook-síðu lögreglunnar í Vestmannaeyjum.

Þar kemur fram að almannavarnanefnd Vestmannaeyja skori á stjórnvöld að gera viðeigandi ráðstafanir til að tryggja að þyrluþjónusta Landhelgisgæslunnar og neyðarþjónusta á sjó og landi verði með viðunandi hætti.

Guð­mundur Úlfar Jóns­son, for­maður Fé­lags flug­virkja, sagði í samtali við Fréttablaðið fyrr í dag viðræðurnar strandi á samningsforminu. Hann hafi hingað til verið sér­sniðinn að starfi flug­virkja en nú sé verið að reyna að breyta honum þannig hann falli að öðrum ríkis­kjara­samningum.

Eina starf­hæfa þyrla gæslunnar, TF-GRÓ þarf að fara í viðhaldsskoðun á morgun sem tekur í það minnsta tvo daga.

Ás­geir Er­lends­son, upp­lýsinga­full­trúi Land­helgis­gæslunnar, sagði í samtali við Fréttablaðið í gær að grafalvarlegt væri að engin þyrla yrði tiltæk í björgunarstarf í svartasta skammdeginu.

Fréttin hefur verið uppfærð.