Þórhildur Sunna Ævarsdóttir, þingflokksformaður Pírata, segir að þrátt fyrir valdastöðu sína séu Klaustursþingmennirnir ekki ósnertanlegir og segir það skipta miklu um útkomu herferðar Miðflokksmanna hvort að framkvæmdarvaldið og dómsvaldið kjósi að standa með rétti almennings til upplýsinga, í pistli á Facebook síðu sinni en hún bendir á að ríkissaksóknari hafi ekkert sagt til um hvort að til standi að rannsaka ummæli þingmannanna um stöðuveitingar í utanríkisþjónustunni.

Þar minnir hún á að þingmenn Miðflokksins sem sátu á sumbli á Klaustur hafi kært Báru Halldórsdóttir til Persónuverndar fyrir að hafa tekið upp samtal þeirra.

„Samtal þar sem Gunnar Bragi og Sigmundur Davíð stæra sig meðal annars af spillingarsamkomulagi við Bjarna Benediktsson og Guðlaug Þór. Persónuvernd hefur málið til meðferðar og getur ákveðið að beita Báru háum sektum,“ segir Þórhildur sem bendir á að á sama tíma hafi þeir hafið málaferli gegn Báru og ætli sér að henni verði gert að borga þeim skaðabætur „fyrir að hafa tekið upp viðbjóðinn og spillingargortið sem vall uppúr þeim.“

Jafnframt segir Þórhildur að á að á sama tíma neiti þeir Sigmundur og Gunnar að mæta á fund stjórnskipunar- og eftirlitsnefndar Alþingis til þess að svara fyrir orð sín og að á sama tíma fréttist ekkert frá ríkissaksóknara um rannsókn á ummælum þeirra.

Valdamisvægið algjört

„Ef við umorðum þessa stöðu aðeins út frá valdastöðu, réttarríki og réttlæti þá horfir hún svona við mér:

Fjórir þingmenn, handhafar löggjafarvalds og þinghelgi beita fyrir sig dómskerfinu og framkvæmdarvaldinu til þess að ná höggi á uppljóstrara sem upplýsti almenning um spillingargort og haturstal þingmannanna.

Dómsvaldið hefur í fyrstu atrennu neitað þeim um að láta beita sér gegn Báru en við vitum ekki hvað gerist ef þeir höfða mál á hendur henni,“ segir Þórhildur og segir að Persónuvernd hljóti að bregðast við fyrst Landsréttur hafnaði gagnaöflunarbeiðni þingmannanna er varðaði Klaustursupptökur Báru og upptökur úr öryggismyndavélum Klausturs.

„Framkvæmdarvaldið Ríkissaksóknari, sem hefur það í höndum sér að rannsaka spillingu innan stjórnkerfisins hefur þó ekkert sagt um hvort það taki mögulegt spillingarbrot Sigmundar, Gunnars Braga, Bjarna og Guðlaugs Þórs til rannsóknar. Ég hef ekki séð fjölmiðla ganga á eftir svörum frá ríkissaksóknara um hvort það standi yfirhöfuð til. Ég vil eindregið hvetja fjölmiðlafólk til þess.“

Þórhildur segir valdamisvægið algert, þingmenn sem séu varðir þinghelgi og góðum efnum beiti fyrir sig báðum öngum ríkisvaldsins gegn konu sem ríkið skammtar lúsarlaun.

„Ég veit ekki hvort lögin okkar séu nógu sterk til þess að vernda uppljóstrarann Báru, þó ég voni það innilega.“