Sprungur á veggjum og hasar í miðri að­gerð

Jarð­skjálftarnir á Reykja­nesi fóru ef­laust ekki fram hjá mörgum en meðal þeirra sem fundu fyrir skjálftunum var Tómas Guð­bjarts­son, hjarta­skurð­læknir á Land­spítala, sem var í miðri að­gerð þegar stóru skjálftarnir riðu yfir.

„Í dag fór hjarta sem við vorum búnir að stöðva allt í einu að skjálfa í miðri að­gerð - og reyndar skurð­stofan öll og líka við sjálfir,“ segir Tómas í færslu á Face­book um málið en að hans sögn var skjálftinn það mikill að sprungur mynduðust á veggjum.

„Þetta voru al­vöru skjálftar og á veggjum legu­deildarinnar mynduðust myndar­legar sprungur. Það var ekkert í stöðunni að taka píratann á þetta og að­gerðin - sem tókst að óskum - kláruð í eftir­skjálftum,“ segir Tómas enn fremur.

Þrátt fyrir að skjálftarnir sjálfir í miðri að­gerð hafi verið mikið mál lýsir Tómas því að upp­lifunin hafi verið enn furðu­legri fyrir sænskan lækni sem var við­staddur. „Hann hafði aldrei upp­lifað jarð­skjálfta – hvað þá í hjarta­að­gerð!“

Með færslunni birtir Tómas mynd af lækna­t­eyminu sem stóð að baki að­gerðarinnar auk þess sem hann birti „heima­gert“mynd­band þar sem at­vikið sjálft náðist ekki á mynd­band.