Að minnsta kosti tuttugu eru særðir eftir öfluga sprengingu í bakaríi í miðborg Parísar í morgun. Bílar og nærliggjandi byggingar urðu fyrir miklum skemmdum og vinna nú slökkviliðsmenn að því að slökkva eld sem kviknaði eftir sprenginguna. Á myndum af vettvangi má sjá brak og glerbrot liggja á götum, en lögregla telur að gasleki hafi verið valdur að sprengingunni. BBC greinir frá.

Sprengingin varð klukkan níu í morgun að staðartíma, eða klukkan átta að íslenskum í litlu bakaríi í níunda hverfi Parísarborgar. Samkvæmt franska dagblaðinu Le Parisien var bakaríið ekki opið þegar sprengingin varð. Almenningur hefur verið beðinn um að halda sig frá vettvangi svo viðbraðgsaðilar geti sinnt störfum sínum í friði. 

Mikill viðbúnaður er í París í dag vegna fyrirhugaðra mótmæla gulvestunga sem hafa komið saman hvern laugardag frá því í nóvember. Áttatíu þúsund lögreglumenn eru á vakt í París í dag, en sprengingin er ekki talin tengjast mótmælunum á nokkurn hátt. 

Samkvæmt upplýsingum frá lögreglu eru að minnsta kosti tuttugu særðir og þar af níu alvarlega. Nokkrir slökkviliðsmenn eru sagðir vera á meðal slasaðra, en þeir  voru á leið sinni á vettvang eftir að tilkynnt var um gasleka, þegar sprengingin varð.

Fréttin hefur verið uppfærð.