Sósíal­ista­flokkurinn fengi fimm menn kjörna á þing ef gengið yrði til al­þingis­kosninga í dag, sam­kvæmt niður­stöðum nýrrar könnunar MMR sem birtar eru í Morgun­blaðinu í dag. Könnunin var gerð dagana 18. til 24. ágúst og tóku 772 ein­staklingar af­stöðu.

Sjálf­stæðis­flokkurinn mælist stærsti flokkur landsins með 23,9% fylgi. Þar á eftir kemur Fram­sóknar­flokkurinn með 12,5%, Vinstri­hreyfingin – grænt fram­boð með 10,9%, Píratar með 10,6%, Sam­fylkingin með 10,5% og Við­reisn með 10,4%. Sósíal­ista­flokkurinn sækir í sig veðrið og mælist fylgi hans nú 8,7%. Mið­flokkurinn er með 6,2% fylgi og Flokkur fólksins 5,1%.

Í um­fjöllun Morgun­blaðsins um niður­stöður könnunarinnar er bent á að báðir ráð­herrar Fram­sóknar­flokksins, Ás­mundur Einar Daða­son og Lilja Al­freðs­dóttir, séu inni en Lilja þó naum­lega. Þá myndi Inga Sæ­land, for­maður Flokks fólksins, ekki komast inn á þing en Tómas A. Tómas­son, oft kenndur við Búlluna, kæmist inn í jöfnunar­sæti.

Ef marka má niður­stöðurnar er saman­lagt fylgi stjórnar­flokkanna 47,3% sem myndi skila þeim 32 þing­sætum og naumum meiri­hluta.