Sigríður Dögg Arnardóttir betur þekkt sem Sigga Dögg kynfræðingur segist vilja vekja athygli á því að sápuþvottur á kynfærum sé ekki nauðsynlegur og geti jafnvel verið skaðlegur.
Í samtali við Fréttablaðið segir Sigga að um lýðheilsumál sé að ræða en á Instagram síðu sinni hefur hún vakið athygli á því að sér hafi borist kvartanir vegna starfsmanns í kvennaklefa Salalaugar sem gengið hafi hart að sundlaugargestum um að sápa sig að neðan.
„Þetta er mega misskilningur. Ég hef alveg heyrt um svona mál frá öðrum sundlaugum, en ég hef aldrei fengið svona margar kvartanir frá einni sundlaug áður.
Ég hef heyrt af svona í kynfræðslu og hef farið með svona mál til bæjarstjórna og beðið um að það sé tekið á þessu og það þarf algjörlega að samræma þetta því það hafa fleiri sveitarfélög haft samband við mig og vilja kanna hvernig þetta er hjá þeim því þetta skiptir ótrúlegu máli,“ segir Sigga Dögg.
Margir veigri sér við sundlaugarheimsóknir
Sigga Dögg segir ótrúlega marga veigra sér við að heimsækja sundlaugar út af svona viðmóti.
„Það eru ótrúlega margar sögur komnar inn af því að fólk veigrar sér við að fara til dæmis í þessa sundlaug út af þessu viðmóti og svo eru börn hrædd, þetta er alveg glatað.“
Fréttablaðið sló á þráðinn til Salalaugar en var tjáð að Guðmundur Halldórsson forstöðumaður laugarinnar væri í fríi. Vaktstjóri vildi ekki ræða málið.
Plakatið orsök vandans
„Það á engin sápa að fara á kynfæri, ekki heldur typpi,“ segir Sigga Dögg.
„Þvagfæralæknar hafa rætt það við mig að þeir hafi stundum lent í vandræðum með karlmenn sem eru komnir með útbrot út af þurrki vegna þess að þeir eru að sápa sig svo mikið.“
Sigga segir um að ræða lýðheilsumál og nefnir eitt frægasta plakat landsins þar sem sundlaugargestum er gert að sápa sig á fótum, í klofi og á höfði.
„Þetta plakat er í öllum sundlaugum og hafðu þá sér sápu ef það á að gerþvo á sér kynfærin. Fyrir utan það, að hver sápar á sér hausinn áður en hann fer í sund? Er ekki í lagi?“ spyr kynfræðingurinn.
Hún segir mikilvægt að varpa ljósi á þennan misskilning. „Þetta er hluti af miklu stærra máli og ég held líka að fólk sé bara komið með nóg.“
