Helga Sæunn Árna­dóttir, móðir Kamillu Ívars­dóttur, 18 ára stúlku sem varð fyrir stór­felldri líkams­á­rás af hálfu fyrrum kærasta síns í fyrra, segist óttast um dóttur sína sem er snúin aftur til á­rásar­manns síns.

„Hann er með eitt­hvað hreðja­tak á dóttur minni og nú hefur hún ekki komið heim síðan á fimmtu­daginn,“ segir Helga í sam­tali við Frétta­blaðið. „Hvort það er af fúsum og frjálsum vilja veit ég ekki þar sem hún hefur ekki svarað mér frá því ég komst að því að hann væri með hana.“

Mæðgurnar ræddu um stór­felldar á­rásir sem Kamilla hafði orðið fyrir í Kastljós viðtali sem vakti mikla at­hygli síðast­liðinn septem­ber. Þar sagðist Kamilla hafa viljað slíta sam­skiptum við fyrrum kærasta sinn þar sem hún vildi ekki að líf hennar myndi enda fyrir tví­tugt.

Nálgunar­bann gagns­laust

Kamilla er með nálgunar­bann á um­ræddan mann sem rennur út næsta fimmtu­dag. „Það er bara ekkert tekið mark á nálgunar­banni, það virkar ekki neitt.“ Helga bendir á að manninum hafi tekist að brjóta gegn nálgunar­banni 122 sinnum á meðan hann sat í fangelsi fyrir að hafa ráðist á hana.

Hvert brot gegn nálgunar­banni getur varðað allt að tveggja ára fangelsis­vist. Helga veltir fyrir sér hversu mörg ár maðurinn þyrfti að sitja inni yrði hann dæmdur fyrir brotin. „Ef þú stelur hangi­kjöti út í búð er tekið harðar á því en þegar brotið er gegn nálgunar­banni sem sett var á eftir að reynt var að ráða niður­lögum ein­hvers.“ Engin sann­girni sé í slíku kerfi.

Hringdi í­trekað úr fangelsinu

Maðurinn hefur þegar lokið af­plánum fyrir dóm sem hann fékk fyrir hrotta­fengna árás gegn Kamillu, en hún vaknaði á spítala, þrí­brotin í and­liti með augn­tóftar­gólfs­brot báðum megin, nef­beins­brot, opið sár á höfði og mar­á­verka víðs vegar um líkama.

„Hann sat að­eins inni í fimm mánuði, frá októ­ber til mars, fyrir að hafa nánast murkað lífið úr dóttur minni. Á meðan var hann í stöðugum sam­skiptum við hana,“ í­trekar Helga. Eftir að maðurinn var látinn laus leið ekki langur tími þar til hann náði Kamillu aftur á sitt band að sögn Helgu.

„Hann hefur komist upp með það frá byrjun að geta hitt hana í gegnum vini sína sem sækja hana og koma með hana til hans.“ Þetta eigi sér allt stað þrátt fyrir nálgunar­bann.

Mæðgurnar ræddu afleiðingar þess að vera í ofbeldissambandi í Kastljósi síðastliðinn september.
Mynd/Skjáskot RÚV

Sagan mun endur­taka sig

„Það er önnur kæra sem liggur uppi á hillu hjá lög­reglu til­búin til birtingar.“ Sú kæra er fyrir á­rásir sem áttu sér stað milli 29. mars til 29. maí, að­eins ör­fáum vikum eftir að maðurinn losnaði úr fangelsi. „Þá hótaði hann henni og sagði að ef hún færi aftur heim myndi hann skera okkur öll á háls.“

Helga kveðst ekki skilja hvers vegna það sé ekki for­gangs­mál hjá lög­reglu að birta kæruna. „Maðurinn er stór­hættu­legur og ég er viss um að sagan muni endur­taka sig með mun hrylli­legri af­leiðingum sem engin mun geta jafnað sig á.“

„Maðurinn er stór­hættu­legur og ég er viss um að sagan muni endur­taka sig með mun hrylli­legri af­leiðingum."

Fjöl­skyldan í sárum

Frá því í síðustu viku hefur Helga verið í miklum sam­skiptum við lög­reglu vegna málsins. „Lög­reglan er búin að fara tvisvar sinnum á heimili hans en þau voru ekki þar í þau skipti,“ segir Helga sem telur sig hafa gert mis­tök með því að segja manninum að hún vissi hvar hann ætti heima.

„Réttur ger­enda er svo gríðar­legur að það eru allir van­máttugir í kringum þá.“ Fjöl­skyldan þjáist veru­lega vitandi af Kamillu heima hjá manninum. „Það er enginn sárs­auki verri en að horfa upp á barnið sitt í of­beldis­sam­bandi.“ Það sé hins vegar lítið hægt að gera þar sem Kamilla sé orðin 18 ára.

Helga segist ekki vita lengi dóttir hennar hefur verið í sam­vistum við manninn en hún hafi sjálf ekki komist að þau væru í samskiptum fyrr en fyrir um tveimur vikum. „Hann hafði verið fjarri huga mínum í marga mánuði og ég hélt að við værum endan­lega laus við hann.“

Nauð­syn­legt sé að fram­fylgja nálgunar­banni og koma í veg fyrir að hægt sé að brjóta í­trekað gegn því án af­leiðinga að mati Helgu. „Hann hefur komist upp með þetta áður svo það er ekkert til að stoppa hann núna, nema að færa hann aftur í fangelsi.“

Fréttin var uppfærð klukkan 16:42

Kamilla Ívarsdóttir hafði sambandið samband við Fréttablaðið og segir móður sína fara með rangt mál. Hún kveðst ekki dvelja hjá árásarmanni sínum heldur hjá vinkonu.