Jarðskjálfti af stærðinni 3,0 varð í Öræfajökli klukkan rétt rúmlega 10 í morgun og fannst hann á bæjum í nágrenni jökulsins. Skömmu síðar mældist annar skjálfti, 1,3 að stærð, á svæðinu.
Í tilkynningu frá náttúruvársérfræðingi Veðurstofu Íslands fylgist sólarhringsvakt Veðurstofunnar með þróun mála á svæðinu.
Rétt fyrir klukkan 9 í morgun varð skjálfti af stærð 2,6 á þessum slóðum og fannst hann einnig í byggð. Minni skjálftar urðu á svæðinu í gær.
Í tilkynningu frá Veðurstofu Íslands kemur fram að síðast hafi orðið skjálfti stærri en 3,0 í Öræfajökli í október 2018. Haustið 2017 og fram í ársbyrjun 2019 urðu hrinur í fjallinu með nokkru millibili en síðan þá hefur verið frekar rólegt á þessum slóðum.
Öræfajökull er í sunnanverðum Vatnajökli og er hæsta fjall landsins. Fjallið er virk eldkeila í ætt við Eyjafjallajökul og Snæfellsjökul, en samkvæmt vefnum eldgos.is er Öræfajökull allmiklu stærri og rúmmálsmeiri en aðrar íslenskar eldkeilur.
Aðeins hefur gosið tvisvar í Öræfajökli frá landnámi, árin 1362 og 1727. Fyrra gosið var öflugt og var magn gosefna sem kom úr því um 30 sinnum meira en í Eyjafjallajökulsgosinu árið 2010. Síðara gosið var mun minna og svipað að umfangi og Eyjafjallajökulsgosið árið 2010.
Fjallað er um skjálftana á Facebook-síðu Eldfjalla- og náttúruvárhóps Suðurlands þar sem fram kemur að Öræfajökull sé talin ein hættulegasta eldstöð landsins. Er bent á að gosið sem varð þar á 14. öld sé stærsta sprengigos á Íslandi frá landnámi.
