Inniliggjandi sjúklingur á blóð- og krabbameinslækningadeild Landspítala (11EG) greindist með COVID-19 eftir skimun um klukkan átta í gærkvöld. Þetta kemur fram í tilkynningu frá Landspítala.

Blóð- og krabbameinslækningadeild hefur því verið lokuð fyrir nýjum innlögnum, en er þó í fullri starfsemi. Um 30 sjúklingar og 20 starfsmenn verða skimaðir fyrir hádegi. Von er á niðurstöðum úr skimunum um klukkan 15:00 í dag Viðkomandi einstaklingar eru ýmist í sóttkví eða vinnusóttkví B þar til þær niðurstöður berast. Samhliða hefur verið gripið til ítrustu sóttvarnaaðgerða á deildinni.

Ekki liggur fyrir hvernig sjúklingurinn smitaðist, en þó er talið líklegast að sjúklingurinn hafi þegar við innlögn verið smitaður. Smitrakning stendur yfir. Sjúklingurinn var lagður inn á 11EG síðdegis á þriðjudag. Skimun í gær leiddi í ljós virkt Covid-19 smit en vegna þess hversu stutt sjúklingurinn lá á deildinni, þá leikur enginn grunur á smiti í sjúklingum eða starfsfólki.

Sjúklingurinn hefur verið fluttur á smitsjúkdómadeild Landspítala (A7) í Fossvogi og settur í einangrun, vegna veikinda sinna.

Sólarhringur er síðan Landspítali þurfti að grípa til svipaðs viðbragðs vegna smits sem kom upp á hjartadeild spítalans. Allir starfsmenn og sjúklingar deildarinnar voru skimaðir og reyndust allir neikvæðir. var því talið að sjúklingurinn væri með eldra smit og hefði smitast áður en hann var lagður inn.

Fréttin hefur verið uppfærð.