Lögreglustjórinn á Vestfjörðum hefur óskað eftir því að maður sem rændi seglskútu, sem geymd var við Ísafjarðarhöfn, um helgina verði settur í farbann. 

Fréttablaðið greindi frá því í gær að Landhelgisgæslan hefði sent varðskipið Þór og þyrlu til aðstoðar lögreglunni á Vestfjörðum í gær til þess að hafa upp á skúturæningjanum, en sneri hann skútunni við að sjálfsdáðum og sigldi til hafnar að Rifi. Við komuna þangað tóku að minnsta kosti tveir sérsveitarmenn, ásamt tveimur starfsmönnum séraðgerðarsviðs Landhelgisgæslunnar á móti skútunni og var varðskipinu Þór snúið aftur til Reykjavíku og var maðurinn handtekinn.

Lögreglan á Vestfjörðum greindi frá því á Facebook-síðu sinni fyrir stuttu að maðurinn hafi verið yfirheyrður vegna málsins og rannsókn miði vel áfram. 

Þá kemur fram að hann verði færður fyrir Héraðsdóm Vestfjarða innan tíðar en þar mun lögreglustjórinn leggja fram farbannsbeiðni.

Að lokum kemur fram að ekki sé tímabært að veita frekari upplýsingar um málið að svo stöddu.