Breskur dóm­stóll hefur dæmt David Carrick, fyrr­verandi lög­reglu­þjón, í að minnsta kosti 30 ára fangelsi fyrir nauðganir gegn tólf konum.

David starfaði fyrir Lundúna­lög­regluna um margra ára skeið en brotin voru framin á árunum 2003 til 2020. Hann játaði sök þegar málið var tekið fyrir í janúar síðast­liðnum.

Í frétt BBC kemur fram að David hafi verið kallaður „skrímslið“ eftir að upp komst um brot hans. Dómari sagði það sér­stak­lega al­var­legt að brotin hafi hann framið á meðan hann var lög­reglu­maður og hlut­verk hans verið að gæta að öryggi al­mennings.

Carrick er sagður hafa nýtt sér yfir­burða­stöðu sína til hins ítrasta og sann­fært fórnar­lömb sín um að á­stæðu­laust væri að leggja fram kæru þar sem hann væri lög­reglu­maður. Í að minnsta kosti eitt skiptið hótaði hann fórnarlambi sínu með skotvopni meðan hann kom fram vilja sínum.

Lundúna­lög­reglan hefur legið undir á­mæli vegna málsins en Carrick hafði verið á­sakaður um kyn­ferðis­brot í nokkur skipti áður en form­leg rann­sókn hófst á brotum hans. Barbara Gray, að­stoðar­lög­reglu­stjóri Lundúna­lög­reglunnar, baðst af­sökunar á að ekki var brugðist við fyrr.

Carrick, sem er 48 ára, þarf að sitja inni í að minnsta kosti 30 ár vegna brota sinna áður en hann getur sótt um reynslulausn.