Verulega hefur dregið úr skriðuhættu á syðra svæði rýmingarinnar í Kinn við Skjálfandafljót og er ástandið þar orðið skaplegt.

Þetta er mat sérfræðinga frá Veðurstofu Íslands og kemur fram í tilkynningu frá Almannavörnum.

Ákveðið hefur verið að aflétta rýmingu á syðra svæðinu sem nær frá og með Ófeigsstöðum og Rangá í norðri að Hrafnsstöðum í suðri.

Vatn í hlíðum hefur minnkað mikið síðan á sunnudag þrátt fyrir rigninguna í gær og þá hafa engar skriður fallið á þessu svæði í hrinunni. Þá er talið að skriðuhætta sé lítil.

Á ytra svæðinu þar sem bæirnir norðan við Ófeigsstaði og Rangá standa í Útkinn hefur ástandið líka lagast að því er fram kemur í tilkynningunni. Ekki hefur frést af neinum nýjum skriðuföllum í rúman sólarhring. Lækir eru enn í skriðusárum en þeir hafa minnkað.

Þrátt fyrir að skriðuhætta hafi minnkað þá þykir enn ástæða til að fylgjast áfram með stöðunni fram eftir degi áður en rýmingu verður aflétt á nyðra svæðinu.

Hættustig almannavarna er því áfram í gildi en óvissustigi á Tröllaskaga hefur verið aflétt.

Vegurinn um Kinn hefur verið opnaður fyrir almennri umferð og er stefnt á að ryðja aur af vegi í Útkinn í dag.

Stöðufundur Veðurstofu Íslands verður haldinn síðdegis í dag og kannað verður hvort öruggt verði að aflétta rýmingu í Útkinn.

Veðurspáin gerir ráð fyrir austanhvassviðri á fimmtudag og þá gæti rignt hressilega, sér í lagi á nyðra svæðinu. Viðbragðsaðilar muni því fylgjast áfram með veðurspánni og taka afstöðu eftir því.