Fjórir menn eru nú í haldi lögreglunnar vegna rannsóknar á máli þar sem skotum var hleypt af í Vogahverfinu í morgun.

Tilkynning um skothvelli við hús í hverfinu barst kl. 6.20 í morgun og fór lögreglan þegar á vettvang, en öllu var af lokið er lögreglumenn komu á vettvang. 

Tveir einstaklingar sem voru í íbúð í húsinu voru handteknir á vettvangi og tveir til viðbótar handteknir þar fyrir utan.

Lögreglan lagði hald á skotvopn sem fannst í íbúðinni, auk nokkurra skothylkja sem fundust á vettvangi. Þá liggur fyrir að byssukúlur höfnuðu í tveimur bifreiðum sem stóðu fyrir utan húsið.

Í tilkynningu lögreglu segir að mikil hætta hafi verið á ferð og mildi þykir að enginn skyldi hafa slasast. Rannsókn máls er á frumstigi og ekki hægt að veita frekari upplýsingar að svo stöddu, segir í tilkynningu lögreglu.