Að minnsta kosti sex manns þurftu að leita sér að­stoðar á slysa­deild eftir að til á­taka kom í Borgar­holts­­skóla í Grafar­vogi um há­­degis­bil í dag. Enginn hlaut al­var­lega á­verka en starfs­fólki, nem­endum og for­eldrum var illa brugðið eftir at­burði dagsins.

Skóla­stjóri Borgar­holts­skóla, Ár­sæll Guð­munds­son, sendi for­eldrum og for­ráða­mönnum bréf um at­burði dagsins í kvöld. „Of­beldis­menn mættu í skólann vopnaðir hnífum, hnúa­járnum og hafna­bolta­kylfu í ein­hverju að því er virðist upp­gjöri sem okkur skilst að hafi átt að fara fram allt annars staðar,“ segir Ár­sæll í bréfinu.

Ekki nem­endur skólans

Á­rásar­mennirnir sem um ræðir eru ekki nem­endur skólans að sögn Ár­sæls en hugðust finna kunningja sína í skólanum. Nem­endum var um tíma haldið innan­dyra til að tryggja öryggi þeirra á meðan lög­regla eltist við annan á­rásar­manninn.

„Þar sem einn of­beldis­mannanna komst undan á hlaupum var allt kapp lagt á að koma nem­endum í öruggt skjól með því að halda þeim í stofum og senda þá heim í hollum.“ Þegar sér­sveit lög­reglunnar bar að garði var allur skólinn rýmdur.

„Við erum öll mjög miður okkar vegna þessa at­burðar en erum stað­ráðin í því að láta hann ekki eyði­leggja fyrir okkur frá­bært skóla­starf Borgar­holts­skóla og halda á­fram skóla­starfinu þegar á morgun,“ í­trekar Ár­sæll.

Myndband náðist af atvikinu.
Fréttablaðið/Aðsend

Of­beldið má ekki sigra

„Við viljum þakka nem­endum fyrir yfir­veguð við­brögð í dag og leggjum ríka á­herslu á að of­beldið má ekki ná að sigra í okkar góða sam­fé­lagi.“

Nem­endum stendur til boða að fá á­falla­hjálp sér­fræðinga í skólanum sem verða til staðar í kennslu­stofum skólans á morgun. Ár­sæll hvetur nem­endur ein­dregið til að ræða at­burðinn heima við og í­trekar að starfs­fólk skólans sé einnig til staðar fyrir nem­endur. „Kennarar munu ræða þennan at­burð við nem­endur sína á morgun en það er mjög mikil­vægt að eiga sam­talið.“

Þegar skólinn var rýmdur urðu fjöl­margar skóla­töskur eftir og bendir Ár­sæll á að hægt verði að nálgast þær á morgun. Að­eins verður hægt að ganga inn um aðal­inn­gang skólans og verður gætt upp á að engum ó­við­komandi aðila verði hleypt inn í skóla­bygginguna.