Að utan lítur hann út eins og hver annar Superb fyrir utan smá mun á grilli og iV merkið aftan á bílnum. Hannn fær sömu Matrix aðalljósin og meira króm en þá er það nánast upptalið. Að innan er það sama uppá teningnum og eiginlega ekkert nýtt að sjá miðað við tveggja ára gamlan Superb, sama hefðbundna mælaborðið með stóra 9,2 tommu Columbus skjánum fyrir utan að kominn er eyðslumælir fyrir rafbúnaðinn vinstra megin. Upplýsingaskjárinn er reyndar með uppfærslu sem býður uppá flettimöguleika sem er framför. Jú, svo er E-takki í miðjustokknum til að keyra bílinn á rafmagninu einu saman. Það verður svo sjaldan kvartað yfir plássleysi í Superb og iV útgáfan er eins rúmgóð að flestu leyti, þótt að farangursrýmið sé ögn minna og óþarfi að fjölyrða um það.

Farangursrýmið er örlítið minna en samt 485 lítrar og dugar því vel.

En hvernig er munurinn á Superb iV og hefðbundnum Superb í akstri? Þar hitti vel á því að fyrir er nýlegur Superb á heimili undirritaðs. Ólíkt mörgum tengiltvinnbílum er rafmótorinn ekki fyrir afturdrifið heldur tengist skiptingunni til að gefa bensínmótorinum auka afl eða keyra bílinn eingöngu á 114 hestafla rafmótornum. Bensínvélin sjálf er 154 hestöfl en saman skila mótorarnir 215 hestöflum. Upptakið er aðeins frísklegra en í dísilbílnum með 190 hestafla vélinni og hann er mjög mjúkur og hljóðlátur á rafmagninu einu saman. Rafhlaðan á að duga fyrir allt að 63 km akstur við bestu aðstæður og satt best að segja dugði hún ágætlega þrátt fyrir talsverðan kulda á meðan á prófun bílsins stóð. Þegar rafhlaðan er tóm er smá hik í upptakinu þegar bílnum er gefið snöggt inn, þar sem hann tekur í smástund af stað á rafmagninu frá minni rafhlöðunni en skiptir síðan yfir á bensínvélina. Bíllinn er mjög hljóðlátur á rafmagninu eingöngu og reyndar einnig á bensívélinni líka. Stýrið virðist líka örlítið léttara í notkun og í meðallagi næmt með 2,7 hringi borð í borð.

Bensínvélin er 154 hestöfl ein og sér en rafmótorinn skilar 114 hestöflum.

Rafhlöðunni er komið fyrir framan við 50 lítra bensíntankinn undir aftursætinu, og hún ásamt rafbúnaðinum bætir allt að 260 kílóum við þyngd bílsins. Bremsurnar virðast vera þær sömu og í dísilbílnum og virka ekki alveg eins vel, bíta betur í léttari dísilbílnum. Rafstillanlegir demparar eru staðalbúnaður í iV bílnum og hann er 10 mm lægri á þeim og þess vegna aðeins stífari í akstri. Aukin þyngd bílsins þýðir að þessi stóri bíll leggst meira út á hliðarnar þegar reynt er á hann í beygjum. Meiri þyngd þýðir líka að hann ræður ekki eins vel við holur og hraðahindranir og þarf að hægja vel á sér ef að slíkt á ekki að hafa áhrif. Til að ráða betur við þyngdina er ökumaður líklegri til að vilja nota sportstillinguna, sem kemur niður á getu bílsins til að ráða við skarpar fyrirstöður. Það má þó ekki túlka þetta sem að það sé eitthvað leiðinlegt að keyra Superb iV þótt muninum sé lýst með þessum hætti. Hann liggur vel og er frísklegur af stað eins og áður sagði miðað við bíl af þessari stærð.

Matrix ljósin eru nú staðalbúnaður í nýjum Superb og það er smávægilegur munur á grilli.

Þá erum við líka komin að því sem er kannski aðal kosturinn við þennan bíl sem er verðið. Fyrir 4.990.000 kr grunnverð fæst rúmgóður, vel búinn 214 hestafla bíll sem getur gengið fyrir rafmagni megnið af þeim tíma sem að flestir nota undir stýri. Ef fara þarf í lengri akstur dugar 1,4 lítra vélin honum ágætlega fyrir hvað sem er. Auk þess á hann fáa keppinauta hérlendis nema þá kannski helst bróðir sinn Passat GTE og Kia Optima PHEV. Ef við skoðum aðeins Kia bílinn kostar sambærileg Optima með stærri rafhlöðunni frá 5.190.777 kr en Passat GTE er talsvert dýrari eða frá 5.890.000 kr. Skoda Superb keppir einnig við Peugeot 508 tvinnbílinn og BMW 330e, en hvorugir eru í boði á verðlistum viðkomandi umboða.

Það eina sem aðgreinir bílinn frá öðrum Superb bílum er iV merkið að aftan.

Grunnverð: 4.990.000 kr
Afl: 215 hestöfl
Tog: 400 Newtonmetrar
Eyðsla bl.ak: 1,4 l/100 km
Rafhlaða: 13 kWh
Drægi rafhlöðu: 63 km
CO2: 35 g/km
Hröðun 0-100 km: 7,3 sekúndur
L/B/H: 4.869/1.864/1.469 mm
Hjólhaf: 2.841 mm
Farangursrými: 485 lítrar