Jarðskjálfti að stærðinni 3,3 mældist í dag klukkan 16:12 um 3,5 km norðaustur við Grindavík.

Veðurstofunni hafa borist tilkynningar um að skjálftans hafi orðið vart í Grindavík og Reykjanesbæ.

Þetta er stærsti skjálftinn á svæðinu frá 13. júní síðastliðnum en þá mældist skjálfti að stærðinni 3,5 á svipuðum slóðum, er segir í tilkynningu frá Veðurstofunni.

Á svipuðum tíma og skjálftinn varð jókst skjálftavirkni á svæðinu og nú mælist þar fjöldi minni skjálfta.

Skjálftavirkni hefur verið viðvarandi á svæðinu undanfarna mánuði í tengslum við aflögun vegna kvikuinnskota í jarðskorpunni með miðju rétt vestan við fjallið Þorbjörn.

Rúmlega 1060 jarðskjálftar mældust á Reykjanesskaga í síðustu viku og tæplega 20 á Reykjaneshrygg. Stærsti skjálftinn var þá 2,9 að stærð um 3 kílómetra norðnorðaustur af Grindavík þann 5. júlí og fannst á svæðinu. Skjálftavirknin var dreifð um skagann, en langmesta virknin var í nágrenni við Grindavík.

Í vikunni þar á undan mældust um 1200 jarðskjálftar á Reykjanesskaga.