Lögregluskírteini Vladímírs Pútín, forseta Rússlands, hefur fundist í skjalasafni Stasi, leyniþjónustu Austur-Þýskalands. Þýska blaðið Bild greindi frá málinu í gær og birti ljósmynd af skírteininu. Með skírteininu hafði Pútí, samkvæmt Bild, algjöran aðgang að skrifstofum Stasi. 

Ekki er ljóst hvort forsetinn hafi unnið með beinum hætti fyrir Stasi en hann var útsendari sovésku leyniþjónustunnar KGB í Dresden í Austur-Þýskalandi.

Stasi stundaði á sínum tíma einstaklega umfangsmikið eftirlit með almennum borgurum í því skyni að uppræta andófsraddir. Mikill fjöldi Austur-Þjóðverja gengdi hlutverki uppljóstrara fyrir Stasi. 

Eftir fall Berlínarmúrsins voru allnokkrir Stasi-liðar fangelsaðir. Aðrir eru hins vegar enn áberandi í Þýskalandi í dag. Til að mynda Matthias Warnig, forstjóri orkufyrirtækisins Nord Stream sem sér um jarðgasleiðslu frá Rússlandi til Þýskalands.