Katrín Jakobsdóttir forsætisráðherra hyggst skipa þriggja manna nefnd sem vinna á úttekt á viðbrögðum stjórnvalda við COVID-19. Meginverkefni nefndarinnar verður að greina áfallastjórnun vegna faraldursins.

Fram kemur í tilkynningu frá stjórnarráðinu að formaður nefndarinnar verði Ásthildur Elva Bernharðsdóttir, dósent við Háskólann á Bifröst, en auk hennar munu Guðný Björk Eydal, prófessor við Háskóla Íslands, og Trausti Fannar Valsson, dósent við Háskóla Íslands, sitja í nefndinni.

Í úttekt nefndarinnar verður meðal annars fjallað um hvernig stjórnvöld voru undirbúin til að takast á við faraldurinn, hvernig ákvarðanatöku var háttað, hvernig upplýsingum var miðlað og hvernig reynslan hafi verið nýtt jafnharðan til aðlögunar á stefnu og áætlanagerð. Þá mun nefndin fjalla um helstu samfélagslegu áhrif faraldursins. Gert er ráð fyrir að nefndin skili úttekt sinni eigi síðar en 1. mars 2022.