Að óbreyttu mega Íslendingar eiga von á að sjá eitthvað af skemmtiferðaskipum í sumar ólíkt síðasta sumri. Afbókanir hafa verið færri en í fyrra og í auknum mæli gera skipafélögin kröfu um bólusetningarvottorð.„Það koma skip en þetta verður ekki stórt sumar,“ segir Pétur Ólafsson, hafnarstjóri hjá Hafnarsamlagi Norðurlands.

Sumarið 2020 kom ekkert skip til Akureyrar og aðeins eitt kom við í smærri höfnum Norðurlands. Pétur segir það hafa verið hroðalegt áfall fyrir rekstur samlagsins og valdið tekjufalli upp á 450 milljónir króna. Skipafélögin panta vanalega pláss með tveggja eða þriggja ára fyrirvara.

Að sögn Péturs hafa flestar afbókanir vegna sumarsins verið snemmsumars en flest skemmtiferðaskipin koma frá miðjum júní fram í miðjan ágúst. „Nokkur skipafélög hafa þegar gefið út að þau ætli að sigla hingað með bólusetta farþega,“ segir hann.

Bókaðar skipakomur hjá Faxaflóahöfnum eru 138 og farþegar tæplega 150 þúsund. Erna Kristjánsdóttir markaðsstjóri segist gera ráð fyrir afbókunum á komandi mánuðum en óljóst sé hversu margar þær verði. Nokkur skipafélög hafi hins vegar fullan hug á að sigla með farþega sem koma í gegnum Leifsstöð og fari í sýnatöku bæði þar og um borð í skipunum.

Um borð í skipunum séu læknar og hjúkrunarfræðingar, ásamt því að sýnatökur eru framkvæmdar. Sérstakur griðastaður er skilgreindur um borð ef einhver veikist.

„Staðan núna hjá flestum skipafélögunum er sú að farþegar farþegaskipa mega ekki ferðast innanlands á eigin vegum, heldur verða þeir að ferðast um í ákveðinni búbblu þannig að auðveldara sé að halda utan um hópinn,“ segir hún.Í fyrra komu aðeins sjö skip með rúmlega 1.300 farþega í Faxaflóahafnir. Tekjufallið var um 600 milljónir króna.