Lögreglan á Egilsstöðum þurfti á öllum sínum mannskap að halda á fjórða tímanum í nótt, þegar hún freistaði þess að stöðva hópslagsmál í sumarbústaðhverfinu á Einarsstöðum.

RÚV greinir frá þessu.

Tveimur hópum, sem voru með bústaði á svæðinu laust saman. Fjórir lögreglumenn voru á vakt en þrír til viðbótar voru kallaðir út þegar lögreglan sá hvers eðlis var. Á bilinu 20 til 30 manns voru í þvögu og einhverjir þeirra að slást, þegar lögreglu bar að garði.

Tveir voru handteknir, samkvæmt RÚV, en þeim hefur verið sleppt. Engin kæra vegna líkamsárásar hefur að sögn borist.

Haft er eftir Hjalta Axelssyni aðalvarðstjóra að mennirnir tveir séu grunaðir um ofbeldi gagnvart lögreglumönnum en annar að auki grunaður um að hafa reynt að tálma handtöku.