Sjö ára íslensk stelpa var meðal nemenda sem fundu í vikunni byssu í runna við grunnskóla í Huddinge, sem er úthverfi í suðurhluta Svíþjóðar. Móðir stelpunnar, sem ekki vill láta nafn síns getið, segir að fjórir eða fimm aðrir nemendur hafi verið í hópnum þegar byssan fannst.
„Við erum bara rosa hissa að það var ekki hringt í okkur. Það var ekki eins og þau höfðu fundið einhverja skóflu eða eitthvað,“ segir móðir stelpunnar í samtali við Fréttablaðið en foreldrarnir fréttu af málinu frá eldri systur stúlkunnar sem einnig er nemandi í skólanum.
Að sögn móðurinnar fengu foreldrarnir póst á miðvikudaginn. „Skólastjórinn hafði samband við okkur seinnipartinn og sagði okkur hvað hafði gerst og að hún ætlaði að tala við krakkana aftur um atvikið.“.
Skiluðu byssunni til kennara
Móðir stelpunnar segir að byssan hafi líklegast ekki verið hlaðin en foreldrar nemanda við skólann hafa ekki fengið miklar upplýsingar um atvikið. „Þeir sögðu það en við vitum það náttúrulega ekki,“ segir móðirin en hún segir að stelpan hafi ekki snert byssuna sjálf.
Samkvæmt frétt á sænska miðlinum Expressen átti atvikið sér stað um hádegisbilið og lögregla kölluð til eftir að nemendurnir skiluðu byssunni til kennara. Að sögn fulltrúa lögreglunnar í Stokkhólmi er enn sem komið er ekki vitað hvaðan byssan kom en um er að ræða brot á vopnalögum. Ekki kemur fram um hvernig byssu var að ræða.
Móðir stelpunnar segir að atvikið hafi ekki haft mikil áhrif á stelpuna þrátt fyrir að það gæti vel verið óhugnanlegt fyrir barn. Að sögn móðurinnar fannst stelpunni aðallega spennandi að hún hafi talað við alvöru lögreglumann, en stóra systir hennar var aftur á móti miður sín.
