„Það verklag sem viðhaft hefur verið er með öllu ólíðandi,“ segir í harðorðri bókun Sjálfstæðisflokksins um umhirðu á grassvæðum, á fundi í bæjarstjórn Reykjanesbæjar sem fram fór á þriðjudagskvöld.

Finnst flokknum umhirða í bænum ekki hafa verið góð að undanförnu og ekkert skipulag á því hvaða svæði eru slegin og hvenær. „Ef þau eru slegin, þá hefur það gerst - að gras er ekki hirt og látið liggja í görðum jafnvel í einhverja daga áður en það er hirt.

Einnig hafa orðið skemmdir bæði á grasflötum og eignum við sláttinn,“ segir í bókuninni.

Vill flokkurinn að farið verði í endurskipulagningu á því hvernig sláttur og umhirða grassvæða verður.

„Þetta er stór hluti af ásýnd bæjarins að hafa snyrtilegar og vel hirtar grasflatir sem og önnur gróðursvæði, götur og gangstíga, sem umhirðu hefur einnig verið ábótavant á,“ bendir flokkurinn á. Hvetur hann til þess að bæjarstjóri taki málið föstum tökum. „Án tafar,“ endar bókunin á að segja.