Eftir að jeppa er ekið yfir sprungu í Langjökli í janúar 2010 á sér stað slys. Móðir og sjö ára sonur hennar falla niður í sprungu og festast á dýpi sem svarar til átta hæða húss. Þegar þyrla og björgunarsveitir koma á vettvang virðast allar bjargir bannaðar.
Björgunarmenn síga niður í ótrúlega þrönga sprunguna þar sem þeir verða að athafna sig á hvolfi og í andnauð. Þeir geta talað við drenginn en ná ekki til hans. Stöðugt dregur af honum vegna ofkælingar. Móðirin svarar ekki. Hér heyja björgunarmenn kapphlaup við tímann – sannkallaðan lífróður.
,,Þegar við vorum alveg að koma upp á brúnina þá læt ég hann [innsk. blm. drenginn] vita. Hann rétt opnar augun á mig og lokar þeim aftur, segir Þórður Guðnason björgunarsveitarmaður sem seig öfugur niður í 25 metra djúpa sprungu (á við átta hæða hús) þar sem hann bjargaði lífi 7 ára drengs í janúar 2010.
Barnið hafði fallið ásamt móður sinni niður í sprunguna en hún lést. Eftir það var afar tvísýnt um hvort tækist að bjarga lífi drengsins. Þórður og Kolbeinn Guðmundsson sigur báðir öfugir – hvor í sínu lagi – til að freista þess að bjarga drengnum og koma móðurinni upp.
Í Útkallsþættinum á Hringbraut talar Óttar Sveinsson við Þórð Guðnason, björgunarsveitarmann frá Akranesi, sem lýsir því þegar hann seig öfugur niður í sprunguna að bjarga drengnum á síðustu stundu. Hér að neðan er hægt að horfa á allan þáttinn.
