Innlent

Skilur reiði Lilju en sárt að vera kallaður of­beldis­maður

Sigmundur Davíð Gunnlaugsson er sár yfir ummælum Lilju Alfreðsdóttir í Kastljósi í gær, er hún kallaði ummæli úr

Vík milli vina. Lilju ofbauð og Sigmundi Davíð sárnaði.

Sigmundur Davíð Gunnlaugsson, formaður Miðflokksins, segir að ekkert sem um hann hafi verið sagt hafi sært hann jafn mikið og orð Lilju Alfreðsdóttur, mennta- og menningarmálaráðherra, í Kastljósi í gær. Lilja ræddi Klaustursupptökurnar í þættinum í gærkvöldi, en í þeim má heyra þingmenn Miðflokksins níða Lilju, segja hana svikula og stungið upp á því að „hjólað verði í helvítis tíkina.“

Kastljósinu í gær sagði Lilja ummælin eima af öfundssýki en var skýr í afstöðu sinni ummælin væru ofbeldi og slíkt ofbeldi ætti ekki að viðgangast á Alþingi. 

„Ég upplifi þetta sem algjört ofbeldi. Þeir eru ofbeldismenn. Ég segi bara að þetta er alveg skýrt í minum huga. Ofbeldismenn hafa ekki dagskrárvald í íslensku samfélagi,“ sagði Lilja. 

Fyrst og fremst mannlegur

Sigmundi Davíð sárnaði þessi ummæli Lilju ef marka má færslu hans á Facebook, sem birt var rétt í þessu. Þar segist hann hafa tekið eftir Lilju í Menntaskólanum í Reykjavík og strax þótt mikið til hennar koma.

„Lilja er klár, hrífandi og dugleg manneskja og hef ég aldrei farið leynt með þá skoðun mína á henni við nokkurn mann. Við unnum náið og vel saman. Eitt af því sem gerði samstarf okkar farsælt er að við erum að mörgu leyti ólík. Hún er skipulögð, ég er það síður, hún hefur afburðagóða samskiptahæfni á meðan ég er heldur feiminn að eðlisfari og í hreinskilni sagt, á köflum klaufalegur í samskiptum,“ ritar Sigmundur, en þau Lilja voru saman í Framsóknarflokknum áður en Sigmundur yfirgaf flokkinn, ásamt Gunnari Braga Sveinssyni sem einnig var á Klaustri umrætt kvöld, og stofnaði Miðflokkinn. 

„Það að vera fyrrum forsætisráðherra og formaður flokks á Alþingi gerir engan fullkominn, því fer fjarri. Ég er fyrst og fremst mannlegur og þarf að takast á að við eigin galla á hverjum degi með það að eilífðarmarkmiði að læra af reynslunni, draga úr göllunum og auka við kostina.

Lilja er vinur minn og það sem hefur reynst mér erfiðast við þau mál sem hafa verið til umræðu að undanförnu var að særa vini mína. Ég skil því vel reiði Lilju.“

Ekkert sært jafn mikið og að vera kallaður ofbeldismaður

Segist Sigmundur hafa verið kallaður fleiri ljótum nöfnum en hann hefur tölu á. „Ég minnist þess hins vegar ekki að hafa áður verið kallaður ofbeldismaður. Ekkert sem um mig hefur verið sagt í pólitík hefur sært mig eins mikið,“ ritar Sigmundur. 

Segir honum sér hafa þótt leitt að heyra Lilju að hann hefði ekki haft samband við hana, en í þættinum er Lilja spurð hvort Klaustursþingmennirnir hafi haft samband við sig með afsökunarbeiðni. Segir Lilja að enginn þingmannana hafi hringt í hana, en segir Sigmund Davíð hafa sent sér afsökunarbeiðni með skeyti. 

„Ég hef auðvitað sagt að þetta sé óafsakanlegt. Ég hef fengið skilaboð frá Sigmundi Davíð og Gunnari Braga og rætt reyndar við, svo ég talaði við Gunnar Braga. Þeir hafa ekki sett sig símleiðis í samband við mig, ekkert af þessu fólki,“ sagði Lilja.

Sem fyrr segir sárnaði Sigmundi þessi ummæli Lilju og segist hann hafa reynt að koma á samskiptum. „Ég sendi henni skeyti með afsökunarbeiðni til að reyna að koma á samskiptum. Þegar ekki barst svar við því bað ég aðra manneskju að láta hana vita hvernig mér liði vegna þess sem gerst hefði og að mig langaði að hitta hana. Hún afþakkaði það boð að sinni.

Ég var vitaskuld miður mín yfir þessu öllu og vildi tala við Lilju um það beint, enda var mitt að gera það. Auk þess að ítreka afsökunarbeiðni hefði ég viljað segja Lilju betur frá heildarmynd samræðnanna þetta kvöld. Því miður hafa bútar verið klipptir úr upptökunum á þann hátt að heildarmynd og samhengi riðlast. Það á meðal annars við um þann þátt sem snýr að Lilju,“ ritar Sigmundur.

Lilja Alfreðsdóttir, mennta- og menningarmálaráðherra. Fréttablaðið/Anton Brink

Segist hafa farið mörgum orðum um mannskosti Lilju

„Áður var ég búinn að hafa mörg orð um mannkosti Lilju og kalla hana frábæra eins og alltaf þegar ég tala um hana. Þau orð hafa hins vegar ekki verið birt. Fram hafði farið löng umræða um Framsóknarflokkinn og að mennirnir sem stjórnuðu þeim flokki létu Lilju ekki njóta sannmælis, þeir létu hana draga vagninn í kosningabaráttunni en virtu hana ekki sem skyldi. Allir eru meðvitaðir um hversu mikið álit ég hef á Lilju enda hef ég leitast við að undanskilja hana í gagnrýni á ríkisstjórnina.

Fyrir vikið hef ég verið sagður hlífa henni um of og að ég léti hana spila með mig um leið og hún spilaði á framsóknarmennina. Í einkasamtalinu sem tekið var upp og dreift er sótt að mér fyrir að halda hlífiskildi yfir Lilju. Þar tek ég undir að henni sé ekki treystandi pólitískt. Nýlegir atburðir höfðu áhrif það. Ég nefni einnig að ég geti sjálfum mér um kennt sem vísar til þess að ég hafi með skipan hennar rétt Framsóknarflokknum líflínu.“

Náttúruleg viðbrögð að þegja eða hlæja

Þá segist Sigmundur skammast sín mikið fyrir að atyrða ekki menn sem notuðu ljót orð í æsingi. Segist hann vonast til þess að einhverjir hafi skilning á því að þegar maður heyrir óþægilega eða grófa hluti séu nátturlegu viðbrögðin oft að láta eins og þeir hafi ekki verið sagðir, eða hlæja vandræðalega.

„Því miður atyrti ég ekki menn sem notuðu ljót orð í æsingi og skammast mín mikið fyrir það. Ég vona þó að einhverjir hafi skilning á því að þegar maður heyrir óþægilega eða grófa hluti eru náttúrulegu viðbrögðin oft þau að láta eins og þeir hafi ekki verið sagðir eða hlægja vandræðalega.

Það að hafa í einkasamtali sagt um annan stjórnmálamann í öðrum flokki að ekki væri hægt að treysta honum pólitískt og viðurkenna að viðkomandi hefði spilað með mig réttlætir vonandi ekki slíkan stimpil.

Með því er ég ekki að afsaka með neinum hætti þær umræður sem urðu þetta kvöld og ég get ekki lýst því hversu miður mín ég er yfir þeim og þeirri atburðarás sem hefur orðið.

Lilju Alfreðsdóttur óska ég alls hins besta hér eftir sem hingað til. Mér þykir mjög vænt um hana og ber mikla virðingu fyrir henni sem manneskju og stjórnmálamanni,“ ritar Sigmundur að lokum.

Athugasemdir

Auglýsing
Auglýsing

Tengdar fréttir

Innlent

Gul stormviðvörun á morgun

Innlent

Lægri fast­eigna­skattur og hærri syst­kina­af­sláttur

Innlent

Vegagerðin vill Þ-H þrátt fyrir nýja greiningu

Auglýsing

Nýjast

Varð fyrir 500 kílóa stálbita

„Hefði orðið upplausn í Bretlandi“

Stóð af sér tillögu um vantraust með góðum meirihluta

Cohen í þriggja ára fangelsi

Ætlar ekki í gegn um aðrar þingkosningar

Meira en 50 karlar keyptu vændi af fatlaðri konu

Auglýsing