Sigmundur Ernir Rúnarsson hefur verið ráðinn ritstjóri Fréttablaðsins og jafnframt aðalritstjóri útgáfufélagsins Torgs ehf sem rekur, auk Fréttablaðsins, DV, Markaðinn og sjónvarpsstöðina Hringbraut. Sigmundur Ernir tekur við starfinu í dag af Jóni Þórissyni sem ritstýrt hefur blaðinu frá haustinu 2019. Hann hyggst nú snúa sér að öðrum verkefnum, en hann er lögfræðingur frá Háskóla Íslands. Jón hefur verið varamaður í stjórn félagsins og mun hann sinna því hlutverki áfram.

„Þetta er spennandi áskorun og ég þakka traustið sem mér er sýnt,“ segir Sigmundur Ernir. „Mitt verkefni verður að efla fréttaþjónustu og dagskrárgerð, hámarka samlegðaráhrif þeirra ólíku miðla sem útgáfufyrirtækið Torg rekur og gera þá að skemmtilegum og eftirsóknarverðum vinnustað.“

Sigmundur Ernir er á meðal reynslumestu fjölmiðlamanna landsins, en hann hóf blaðamennsku á síðdegisblaðinu Vísi fyrir réttum 40 árum. Þaðan lá leiðin á Helgarpóstinn og síðar á Ríkissjónvarpið, en eftir stofnun Stöðvar 2 haustið 1986 varð hann landskunnur fréttaþulur í sjónvarpi um langt árabil. Hann varð ritstjóri DV 2001, fréttaritstjóri Fréttablaðsins 2004, fréttastjóri Stöðvar 2 2005 og settist svo á Alþingi fyrir Samfylkinguna í Norðausturkjördæmi frá 2009 til 2013. Að afloknum þingstörfum tók hann loks þátt í stofnun og stjórnun sjónvarpsstöðvarinnar Hringbrautar sem varð hluti af útgáfufélaginu Torgi snemma á síðasta ári. Þar að auki er Sigmundur Ernir kunnur af ritverkum sínum, en eftir hann liggur á þriðja tug bóka.

„Þetta hefur verið viðburðarríkur tími og ákaflega skemmtilegur. Hér hef ég kynnst góðu fólki sem ég lít á sem vini mína og saman höfum við komið ýmsu í verk. Ég tók lagapróf fremur seint á ævinni og það stóð aldrei til að staldra lengi við. Nú finnst mér tímabært að leita á önnur mið,“ segir Jón Þórisson.

„Það er mikill söknuður af Jóni Þórissyni og vil ég þakka honum vel unnin störf og óska honum alls hins besta á nýjum vettvangi. Að sama skapi eru spennandi tímar framundan með nýjan mann í hlutverki aðalristjóra. Sigmundur Ernir hefur verið farsæll í störfum sínum á íslenskum fjölmiðlum og mun án efa setja sinn blæ á miðla Torgs í framtíðinni, segir Björn Víglundsson, forstjóri Torgs, útgefanda miðlanna.